कॅनबेरा, 30 ऑक्टोबर (हिं.स.) भारतीय एकदिवसीय संघाचा उपकर्णधार श्रेयस अय्यरने दुखापतीतून बरे होत असताना त्याच्या शुभचिंतकांच्या पाठिंब्याबद्दल कृतज्ञता व्यक्त केली आहे. ऑस्ट्रेलियाविरुद्धच्या तिसऱ्या एकदिवसीय सामन्यात झेल घेण्याच्या प्रयत्नात अय्यरला दुखापत झाली. तपासणीत प्लीहाची गंभीर दुखापत झाल्याचे उघड झाले. श्रेयस अय्यरने आपल्या सोशल मीडिया अकाउंट एक्स वरील पोस्टमध्ये लिहिले की, मी सध्या बरे होण्याच्या प्रक्रियेत आहे. मी दिवसेंदिवस बरा होत आहे. मला मिळालेल्या शुभेच्छा आणि पाठिंब्याबद्दल मी मनापासून आभारी आहे. तुमच्या प्रार्थनेत मला ठेवल्याबद्दल सर्वांचे आभार.

२५ ऑक्टोबर रोजी, ऑस्ट्रेलियाच्या डावाच्या ३४ व्या षटकात हर्षित राणाच्या चेंडूवर ऍलेक्स कॅरीला झेल दिल्यानंतर श्रेयस अय्यर जमिनीवर कोसळला. त्याला ताबडतोब मैदानाबाहेर नेण्यात आले आणि नंतर ड्रेसिंग रूममध्ये श्वास घेण्यास त्रास होऊ लागला. सुरुवातीला ही बरगडीची दुखापत असल्याचे मानले जात होते. पण नंतर, दुखापतीची तीव्रता निश्चित झाल्यानंतर, त्याला सिडनी रुग्णालयाच्या आयसीयूमध्ये दाखल करण्यात आले.

भारतीय क्रिकेट नियामक मंडळाने एका निवेदनात म्हटले आहे की, श्रेयस अय्यरला गंभीर दुखापत झाली होती. ज्यामुळे अंतर्गत रक्तस्त्राव देखील झाला. दुखापतीची त्वरित ओळख पटली. उपचारानंतर लगेचच रक्तस्त्राव थांबला. निवेदनात पुढे म्हटले आहे की, अय्यरची प्रकृती आता स्थिर आहे आणि त्याला निरीक्षणाखाली ठेवण्यात आले आहे. मंगळवारी केलेल्या स्कॅनमध्ये त्याच्या दुखापतीत लक्षणीय सुधारणा दिसून आली. बोर्डाच्या वैद्यकीय पथकाने सिडनी आणि भारतातील तज्ञांशी सल्लामसलत करून त्याच्या प्रकृतीवर लक्ष ठेवले आहे.

श्रेयस अय्यरने पर्थमध्ये ऑस्ट्रेलियाविरुद्धच्या पहिल्या एकदिवसीय सामन्यात ११ धावा केल्या. त्यानंतर त्याने ऍडलेडमध्ये ६१ धावांची खेळी केली. तिसऱ्या सामन्यात त्याने फलंदाजी केली नाही. या मालिकेसह अय्यर आयसीसी पुरुषांच्या एकदिवसीय फलंदाजी क्रमवारीत एका स्थानाने सुधारणा करून ९ व्या स्थानावर पोहोचला आहे.

---------------

हिंदुस्थान समाचार / वृषाली देशपांडे