रायगड, 6 ऑक्टोबर (हिं.स.)।
मेरा युवा भारत रायगड यांच्या वतीने आंतरराष्ट्रीय ज्येष्ठ नागरिक दिनानिमित्त अलिबागमधील श्री समर्थ कृपा वृद्धाश्रम येथे विशेष कार्यक्रम आयोजित केला गेला. या उपक्रमात प्रिझम सामाजिक विकास संस्था अलिबाग, स्वयंसिद्ध सामाजिक विकास संस्था रोहा आणि स्पर्धा विश्व अकॅडमी अलिबाग यांनी सहकार्य केले. जिल्हा युवा अधिकारी अमित पुंडे यांच्या प्रमुख मार्गदर्शनाखाली कार्यक्रम पार पडला.
कार्यक्रमाची सुरुवात वृद्धांचे सन्मान करत उद्घाटनाने झाली. श्री समर्थ कृपा वृद्धाश्रमाचे संचालक अॅड. जयेंद्र गुंजाळ यांनी आश्रमाची ओळख करून दिली व वृद्धांची काळजी घेण्याबाबत माहिती दिली. लायन अॅड. डॉ. निहा अनिस राऊत यांनी वृद्धांचे मानसिक आणि शारीरिक स्वास्थ्य टिकवण्यासाठी उपयोगी टिप्स आणि मार्गदर्शन केले. अॅड. कला ताई पाटील यांनी संगीतातून उपस्थितांचे मन मोहून जीवन आनंदाने जगण्याचे महत्त्व अधोरेखित केले.
कार्यक्रमात तपस्वी गोंधळी, प्रिझम संस्थेच्या अध्यक्षा आणि राष्ट्रीय युवा पुरस्कारार्थी, यांनी युवक-युवतींना समाजासाठी योगदान देण्याची गरज समजावून सांगितली. जिल्हा युवा अधिकारी अमित पुंडे यांनी उपस्थितांना आंतरराष्ट्रीय ज्येष्ठ नागरिक दिनाच्या शुभेच्छा दिल्या व अॅड. जयेंद्र गुंजाळ यांच्या कार्याचे कौतुक केले.
यावेळी अलविना आयझॅक मॅडम, स्पर्धा विश्व अकॅडमीच्या युवती व विविध सामाजिक कार्यकर्ते उपस्थित होते. विशेष आनंदाची गोष्ट म्हणजे अकॅडमीतील प्रणाली तळेगावकर यांचा वाढदिवस देखील कार्यक्रमाच्या दरम्यान साजरा करण्यात आला, ज्यामुळे कार्यक्रमाचे औचित्य आणखी वाढले.
हा उपक्रम फक्त सन्मानाचा नव्हे, तर समाजातील ज्येष्ठ नागरिकांशी संवाद साधण्याचा, त्यांच्या अनुभवातून प्रेरणा घेण्याचा आणि युवक-युवतींमध्ये सामाजिक जबाबदारीची भावना रुजवण्याचा एक संस्मरणीय दिवस ठरला. उपस्थितांनी वृद्धांच्या अभिप्राय ऐकून त्यांना सुखद अनुभूती देण्याचा प्रयत्न केला, तर कार्यक्रम संपन्न करण्यामध्ये प्रत्येक संस्थेचे योगदान आणि सहभाग विशेष उल्लेखनीय ठरले. हा दिवस शिक्षण, सन्मान आणि सामाजिक जबाबदारीची आठवण म्हणून स्मरणात राहील.
---------------
हिंदुस्थान समाचार / संदेश साळुंके
