नाशिक, 6 ऑक्टोबर (हिं.स.

सिंहस्थ कुंभमेळ्याच्या अनुषंगाने विविध कार्यान्वयीन यंत्रणांकडून होणाऱ्या विकास कामांच्या निधी वितरणासाठी आता नाशिक-त्र्यंबकेश्वर कुंभमेळा प्राधिकरणाने वित्तीय कार्यप्रणाली निश्चित केली आहे. विकासकामांच्या प्रत्येक टप्प्यांवर आता निधी वितरणाची कार्यपद्धती निश्चित करण्यात आली असून कामाची सद्य:स्थिती आणि कुंभमेळ्यासाठीचे त्याचे महत्व तसेचं त्यातील जनहित लक्षात घेऊनच प्राधिकरणाकडे निधी उपलब्ध असलेल्या निधीचे वितरण केले जाणार आहे. यासंबंधीच्या सूचना प्राधिकरणाचे अध्यक्ष तथा विभागीय आयुक्त डॉ. प्रवीण गेडाम यांनी यंत्रणांना दिल्या आहेत.

प्राधिकरणाकडे निधी उपलब्ध असतांना तो काही प्रमाणात कामाच्या खर्चापेक्षा अधिक संबंधित यंत्रणेकडे राहील अशी व्यवस्था या कार्यप्रणालीमुळे शक्य होणार आहे. यामुळे कंत्राटदारांची देयकेही वेळेवर निर्गमित करण्यास मदत होईल. मात्र गुणवत्ता आणि इतर बाबी मध्ये कमतरता आढळल्यास, त्या दूर झाल्यावरच निधी वितरित करण्यात येईल. यामुळे कुंभमेळ्याच्या कामांना गती येण्यासोबत कामाची गुणवत्ता कायम ठेवण्यासही मदत होणार आहे. या संपूर्ण कामांमध्ये पारदर्शकता आणण्यासाठी ही कार्यपद्धती उपयुक्त ठरणार आहे.

नाशिक त्र्यंबकेश्वर कुंभमेळा प्राधिकरण अधिनियम २०२५ च्या कलम १५ नुसार शासनाचे विविध प्रशासकीय विभाग, शासकीय कंपन्या किंवा संविधिक मंडळे किंवा महामंडळे यांच्या कडून नाशिक-त्र्यंबकेश्वर कुंभमेळा प्राधिकरणाकडे प्राप्त झालेला निधी त्वरित संबंधित अंमलबजावणी अभिकरण किंवा कार्यालयीन यंत्रणेला वितरीत करण्यासाठी ही कार्यप्रणाली निश्चित करण्यात आली आहे. यामुळे, प्रशासकीय मान्यता दिलेल्या कामांच्या बाबतीत संबंधित लेखाशिर्षात प्राधिकरणाकडे उपलब्ध निधीच्या प्रमाणात संबंधित कामांना कार्यारंभ आदेशानंतर त्या त्या प्रमाणात, मात्र एका टप्प्यात कामाच्या एकूण रकमेच्या अधिकतम २० टक्के इतका निधी वितरीत करण्यात येईल. त्यासाठी या यंत्रणांनी त्यांच्या कामाचा कार्यारंभ आदेश निर्गमित झाल्याबरोबर निधीची मागणी करणे आवश्यक आहे.

कामाच्या कार्यारंभ आदेशाच्या रक्कमेच्या २० टक्के रकमेपैकी तीन-चतुर्थांश रक्कम (म्हणजेच एकंदरीत रक्कमेच्या १५ टक्के रक्कम) सबंधित कंत्राटदार, पुरवठादार, सेवा पुरवठादार यांना कामाच्या भौतिक प्रगतीनुसार अदायगी झाल्यानंतर पुढील २० टक्के रक्कमेची मागणी प्राधिकरणाकडे करावी लागेल. हीच पद्धत पुढील २० टक्के निधी मागणीसाठी अवलंबावी लागणार आहे. अशाप्रकारे प्राप्त झालेल्या एकूण ४० टक्के रक्कमेपैकी ३५ टक्के रक्कम अदायगी झाल्यानंतर त्यापुढील २० टक्के रकमेची मागणी करता येणार आहे.

पहिल्या टप्प्यानंतरच्या रक्कमा वितरीत होण्यापूर्वी नाशिक-त्र्यंबकेश्वर कुंभमेळा प्राधिकरण अधिनियम २०२५ मधील विविध तरतुदीनुसार पारित केलेल्या आदेशाची, निर्देशाची आणि सूचनांची काटेकोरपणे अंमलबजावणी होत आहे किंवा कसे याची पडताळणी प्राधिकरण करेल. तसेच वेग आणि गुणवत्ता नियंत्रणाबाबत दिलेल्या निर्देशाचे पालन झाले आहे किंवा कसे याची विशेषतः तपासणी करण्यात येईल. त्यामुळे कामाचा दुसरा हप्त्यापासून पुढील निधीची मागणी करतांना याबाबतचे सर्व खुलासे संबंधित अंमलबजावणी अभिकरण किंवा कार्यालयीन यंत्रणांनी समाधानकारकरित्या दिले आहेत याची खात्री प्राधिकरणाच्या कार्यालयामार्फत करण्यात येईल. समाधानकारक खुलासे, स्पष्टीकरण नसल्यास उचित पूर्तता झाल्याशिवाय पुढील निधी वितरित करण्यात येणार नाही, असे ही वित्तीय कार्यप्रणाली निश्चित करताना स्पष्ट करण्यात आले आहे.

विनाकारण कामे रखडणार नाही, याची काळजी संबंधित यंत्रणांना घ्यावी लागणार आहे. सर्व अंमलबजावणी अभिकरण किंवा कार्यालयीन यंत्रणांनी निधीची मागणी करतांना प्राधिकरणामार्फत त्रयस्थ यंत्रणा तपासणी शुल्क वगळून फक्त कामाच्या कार्यारंभ आदेशाच्या रक्कमेची मागणी प्राधिकरणाकडे करावी, असेही स्पष्ट करण्यात आले आहे.

विशिष्ट प्रकल्प, लहान कामे, वस्तू पुरवठा, सेवा पुरवठा अशा प्रकारच्या कामामध्ये कालापव्यय टाळण्यासाठी कमी टप्प्यात निधी वितरणासाठी मागणी प्राधिकरणाकडे नोंदविता येणार असून प्रकरणपरत्वे त्याचा विचार करण्यात येईल. विशिष्ट कामासाठी दिलेला निधी अध्यक्ष, नाशिक-त्र्यंबकेश्वर कुंभमेळा प्राधिकरण यांच्या पूर्वपरवानगी शिवाय इतरत्र वळविता येणार नसून यामुळे कामे सुनियोजित पद्धतीने होण्यास मदत होईल.

सर्व अंमलबजावणी अभिकरण आणि कार्यालयीन यंत्रणांनी या वित्तीय कार्यप्रणालीमध्ये दिलेल्या निर्देशांचे तंतोतंत पालन होईल, याची दक्षता घेण्याचे निर्देशही परिपत्रकाद्वारे देण्यात आले आहेत.

---------------

हिंदुस्थान समाचार / GOSAVI CHANDRASHEKHAR SUKDEV