गडचिरोली., 6 ऑक्टोबर (हिं.स.)

सिरोंचा उपविभागातील अवैध गौण खनिज प्रकरणात जिल्हा प्रशासनाने तपासणीची कारवाई करत 15 हजार 665 ब्रास अवैध रेतीसाठा व वाहने जप्त केली आहेत.

सिरोंचा विभागात अवैध रेती तस्करीबाबत सातत्याने तक्रारी प्राप्त होत असल्याने जिल्हाधिकारी अविश्यांत पंडा यांनी सहाय्यक जिल्हाधिकारी तथा अहेरीचे उपविभागीय अधिकारी कुशल जैन यांना याबाबत विशेष तपासणी करण्याच्या निर्देश दिले होते.

कुशल जैन यांच्या पथकाने नुकतीच अंकिसा माल, चिंतरेवला व मद्दीकुंठा येथे तपासणीची कारवाई केली. यावेळी अंकिसा माल येथे सर्व्हे नंबर ९०८ मधील रेती साठ्यात ६४ ब्रास आणि सर्व्हे नंबर ६९० व ६९१ मधील साठ्यात ५९ ब्रास रेतीची तफावत (कमी साठा) आढळली आहे. या दोन्ही प्रकरणात चौकशी करण्यात येत आहे. तर मद्दीकुंठा येथील सर्व्हे नंबर ५३३ मध्ये परवानगी असलेल्या ठिकाणी भेट दिली असता, रेतीसाठा दुसऱ्याच जागेवर म्हणजेच सर्व्हे नंबर ३५६ जागेवर असल्याचे आढळले. मोजमाप अहवालानुसार, या ठिकाणी एकूण १५ हजार ६६५ ब्रास रेतीसाठा दिसून आला. साठवणूक आणि वाहतुकीसाठी संबंधितांकडे कोणताही वैध परवाना उपलब्ध नसल्यामुळे, हा साठा अवैध घोषित करून जप्त करण्यात आला. याशिवाय, गौण खनिज उत्खनन व वाहतुकीसाठी वापरण्यात आलेली २ जेसीबी मशीन, १ पोकलैंड मशीन आणि ५ ट्रक ही वाहने देखील जप्त करण्यात आली आहेत.

तहसिलदार, सिरोंचा यांनी महाराष्ट्र जमीन महसूल अधिनियम १९६६ चे कलम ४८(७) व ४८(८) मधील तरतुदीनुसार पुढील कार्यवाहीसाठी उपविभागीय अधिकारी, अहेरी यांचेकडे अहवाल सादर केला आहे. त्यात जप्त केलेल्या १५,६६५ ब्रास अवैध साठ्यासाठी प्रति ब्रास ₹ १८,६०० दंड (पेनल्टी) प्रमाणे एकूण अंदाजित रक्कम २९ कोटी ३६ लाख ५६ हजार ८०० रुपये दंड प्रस्तावित करण्यात आला आहे.

अंतिम सुनावणी आणि अपीलाच्या अधीन राहून ही दंडाची रक्कम निश्चित होईल. या सर्व प्रकरणात चौकशी सुरू असल्याचे सहायक जिल्हाधिकारी कुशल जैन यांनी कळविले आहे.

---------------

हिंदुस्थान समाचार / Milind Khond