कॅनबेरा, 9 ऑक्टोबर (हिं.स.)।भारताचे संरक्षणमंत्री राजनाथ सिंह गुरुवारी (दि.९) ऑस्ट्रेलियाची राजधानी कॅनबेरा येथे पोहोचले. तेथे त्यांचे भव्य स्वागत करण्यात आले. राजनाथ सिंह यांच्या या दौर्‍याचा उद्देश भारत आणि ऑस्ट्रेलिया यांच्यातील संरक्षण व रणनीतिक सहकार्य अधिक बळकट करणे आहे.

कॅनबेरा विमानतळावर ऑस्ट्रेलियाचे सहायक संरक्षणमंत्री पीटर खलील आणि जॉइंट ऑपरेशन्सचे प्रमुख वाइस अ‍ॅडमिरल जस्टिन जोन्स यांनी राजनाथ सिंह यांचे मनापासून स्वागत केले. यानंतर ऑस्ट्रेलियाच्या संसद भवनात राजनाथ सिंह यांचा औपचारिक स्वागत समारंभ आयोजित करण्यात आला. यावेळी ऑस्ट्रेलियाचे उप-पंतप्रधान आणि संरक्षणमंत्री रिचर्ड मार्ल्स यांनी त्यांचे स्वागत केले. यावेळी एक पारंपरिक ‘वेलकम टू कंट्री’ धुराचे समारंभ आयोजित करण्यात आले, जो ऑस्ट्रेलियाच्या आदिवासी संस्कृतीचा एक महत्त्वपूर्ण भाग आहे. हा समारंभ त्या भूमीच्या पारंपरिक रक्षकांना आदर देण्यासोबतच मैत्री आणि समेटाचा संदेश देतो.

राजनाथ सिंह यांनी ऑस्ट्रेलियाचे उप-पंतप्रधान व संरक्षणमंत्री रिचर्ड मार्ल्स यांच्याशी सखोल आणि सकारात्मक चर्चा केली. या बैठकीला दोन्ही देशांचे वरिष्ठ संरक्षण अधिकारीही उपस्थित होते. दोन्ही नेत्यांनी भारत-ऑस्ट्रेलिया संरक्षण सहकार्याच्या वेगाने होत असलेल्या प्रगतीचे कौतुक केले आणि भविष्यात हे सहकार्य आणखी विस्तारण्यावर भर दिला. दोन्ही देशातील चर्चा भविष्याकडे लक्ष देणारी होती आणि धोरणात्मक समन्वय मजबूत करण्यावर विशेष लक्ष केंद्रित करण्यात आले.ऑस्ट्रेलियाचे पंतप्रधान अँथनी अल्बनीजही या बैठकीत सहभागी झाले, ज्यावरून स्पष्ट होते की कॅनबेरा भारताशी असलेल्या भागीदारीला किती महत्त्व देतो. बैठकीदरम्यान अल्बनीज आणि राजनाथ सिंह यांच्यात झालेली उबदार चर्चा आणि एकजुटीचे दृश्‍य हे दोन्ही देशांमधील सखोल संबंधांचे प्रतीक ठरले.

---------------

हिंदुस्थान समाचार / Priyanka Bansode