नवी दिल्ली , 10 नोव्हेंबर (हिं.स.)।पंजाबी गायक आणि सुपरस्टार दिलजीत दोसांझ पुन्हा एकदा खलिस्तानी समर्थकांच्या निशाण्यावर आला आहे. अलीकडेच खलिस्तानी दहशतवादी गुरपतवंत सिंह पन्नू यांच्या धमकीनंतर ऑस्ट्रेलियातील पर्थ येथे झालेल्या त्यांच्या लाइव्ह कॉन्सर्टदरम्यान काही लोकांनी ‘खलिस्तान जिंदाबाद’ अशी घोषणाबाजी करून वातावरण बिघडवण्याचा प्रयत्न केला. आणि आता न्यूझीलंडमधील ऑकलंडमधील त्याच्या कार्यक्रमाला खलिस्तानी गुंडांनी थांबवण्याची धमकी दिली आहे.

सूत्रांच्या माहितीनुसार, पर्थमधील दिलजीत दोसांझ यांच्या शोदरम्यान काही खलिस्तानी समर्थक प्रेक्षकांमध्ये शिरले आणि मंचाजवळ येऊन नारेबाजी सुरू केली. मात्र, तेथे उपस्थित सुरक्षा कर्मचाऱ्यांनी परिस्थिती तत्काळ नियंत्रणात आणली. दिलजीत यांनी आपली परफॉर्मन्स सुरूच ठेवली आणि हजारो प्रेक्षकांनी टाळ्यांच्या गजरात आणि उत्साहात त्यांना प्रोत्साहन दिले.ही संपूर्ण घटना अशा वेळी घडली, जेव्हा पन्नूने आधीच दिलजीतला धमकी दिली होती की तो त्यांच्या परदेशातील कार्यक्रमांना अडथळा निर्माण करेल. अहवालांनुसार, खलिस्तानी समर्थक गटांनी आता न्यूझीलंडमधील ऑकलंड येथे होणाऱ्या दिलजीत दोसांझ यांच्या पुढील कॉन्सर्टलाही लक्ष्य करण्याचा इशारा दिला आहे.

सोशल मीडियावर प्रसिद्ध केलेल्या संदेशांमध्ये पन्नूने दावा केला आहे की, तो दिलजीतचा शो होऊ देणार नाही आणि त्यासाठी आपल्या समर्थकांना सक्रिय केले आहे. दिलजीत दोसांझ यांना सातत्याने मिळत असलेल्या या धमक्यांमुळे हे स्पष्ट होते की परदेशात सक्रिय खलिस्तानी गट आता भारतीय कलाकारांनाही त्यांच्या राजकीय अजेंड्यात ओढण्याचा प्रयत्न करत आहेत.

या घटकांचा उद्देश परदेशात भारताची प्रतिमा खराब करणे आणि तेथे राहणाऱ्या भारतीय समुदायामध्ये तणाव निर्माण करणे हा आहे. तथापि, दिलजीत दोसांझ यांनी अद्याप या धमक्यांबाबत कोणतेही अधिकृत विधान केलेले नाही. मात्र, त्यांनी अलीकडील एका मुलाखतीत म्हटले होते की —“संगीत आणि कला धर्म किंवा राजकारणाच्या सीमांमध्ये कधीच बांधली जाऊ शकत नाही.”

---------------

हिंदुस्थान समाचार / Priyanka Bansode