कॅनबेरा, 15 नोव्हेंबर (हिं.स.)इंग्लंडविरुद्धच्या अ‍ॅशेस मालिकेत ऑस्ट्रेलियाला पहिला मोठा धक्का बसला आहे. स्टार वेगवान गोलंदाज जोश हेझलवूड दुखापतीमुळे पहिल्या कसोटी सामन्यात खेळू शकणार नाही. हेझलवूडने व्हिक्टोरियाविरुद्धच्या शेफील्ड शिल्ड सामन्यासाठी न्यू साउथ वेल्स संघातून माघार घेतली होती. स्कॅनमध्ये हॅझलवूडला दुखापत झाल्याचे दिसून आले. ऑस्ट्रेलियाने मायकेल नेसरला संघात समाविष्ट केले आहे. हेझलवूड आणि शॉन अ‍ॅबॉटऐवजी नेसरला ऑस्ट्रेलियन संघात स्थान मिळाले आहे.
क्रिकेट ऑस्ट्रेलियाने एका निवेदनात म्हटले आहे की, जोश हेझलवूडचा पुन्हा स्कॅन करण्यात आला, ज्यामध्ये हॅझलवूडचा स्नायूंचा ताण असल्याचे दिसून आले नाही. पण नवीन स्कॅनमध्ये दुखापतीची पुष्टी झाली आहे. परिणामी, हेझलवूड पर्थमध्ये होणाऱ्या पहिल्या ऍशेस कसोटी सामन्यात खेळू शकणार नाही. पहिल्या कसोटीसाठी ऑस्ट्रेलियन संघात मायकेल नेसरचा समावेश करण्यात आला आहे. हेझलवूड आणि शॉन अ‍ॅबॉटची जागा नेसर घेईल. २०२१ च्या अ‍ॅशेस दरम्यान अ‍ॅडलेडमध्ये कसोटी पदार्पण करणारा आणि आतापर्यंत दोन कसोटी सामने खेळलेला नेसर ऑस्ट्रेलियाच्या वेगवान गोलंदाजी विभागातील पोकळी भरून काढण्यात महत्त्वाची भूमिका बजावू शकतो.
ऑस्ट्रेलियाचा वेगवान गोलंदाजी विभाग सध्या दुखापतींनी ग्रासलेला आहे. शॉन अ‍ॅबॉट, लान्स मॉरिस, झाय रिचर्डसन, स्पेन्सर जॉन्सन आणि कमिन्स-हेझलवूड हे सर्वजण दुखापतींमुळे संघा बाहेर आहेत. यामुळे ब्रेंडन डॉगेटच्या पदार्पणाची शक्यता खूप जास्त आहे. डॉगेट अलीकडेच किरकोळ हॅमस्ट्रिंग दुखापतीतून बरा झाला आहे आणि या हंगामात त्याने १४.६९ च्या सरासरीने १३ शिल्ड विकेट्ससह निवडकर्त्यांना प्रभावित केले आहे.
दरम्यान, कर्णधार पॅट कमिन्स एससीजीमध्ये आपले पुनर्वसन सुरू ठेवत आहे. आणि ४ डिसेंबरपासून गाबा येथे होणाऱ्या दुसऱ्या अ‍ॅशेस कसोटीसाठी तंदुरुस्त होण्यासाठी तो प्रयत्नशील असणार आहे.
---------------
हिंदुस्थान समाचार / वृषाली देशपांडे
