नवी दिल्ली, 15 नोव्हेंबर (हिं.स.)भारतीय कुस्ती महासंघाने (WFI) ऑलिंपिक पदक विजेता अमन सेहरावत आणि ज्युनियर कुस्तीपटू नेहा सांगवान यांच्यावरील निलंबन मागे घेतले आहे. या वर्षाच्या सुरुवातीला एका मोठ्या आंतरराष्ट्रीय स्पर्धेत जास्त वजन असल्याने दोन्ही कुस्तीपटूंवर बंदी घालण्यात आली होती. या निर्णयाचा अर्थ असा आहे की, ते प्रो रेसलिंग लीग (PWL) च्या आगामी हंगामाच्या लिलावात भाग घेऊ शकतील.

पॅरिस गेम्समधील कांस्यपदक विजेता अमनला सप्टेंबरमध्ये क्रोएशियातील झाग्रेब येथे झालेल्या जागतिक अजिंक्यपद स्पर्धेत जास्त वजन असल्याने निलंबित करण्यात आले होते, तर ऑगस्टमध्ये बल्गेरियातील सामोकोव्ह येथे झालेल्या ज्युनियर वर्ल्ड चॅम्पियनशिपमधून अपात्र ठरल्यानंतर नेहाला निलंबित करण्यात आले होते. दोन्ही कुस्तीपटूंना कारणे दाखवा नोटीस बजावण्यात आली होती. नोटीसचे उत्तर अमनला २२ सप्टेंबर रोजी आणि नेहाला २५ ऑगस्ट रोजी मिळाले होते आणि अनुक्रमे २८ सप्टेंबर आणि १८ सप्टेंबर रोजी उत्तर मिळाले होते. झाग्रेब स्पर्धेसाठी नियुक्त केलेल्या प्रशिक्षकांनाही नोटीस बजावण्यात आल्या होत्या.

WFI नुसार, कुस्तीपटूंनी आपल्या लेखी निवेदनात ही घटना त्यांची पहिली चूक असल्याचे वर्णन केले आणि असे उल्लंघन पुन्हा होणार नाही असे आश्वासन फेडरेशनला दिले. १३ नोव्हेंबर रोजी झालेल्या WFI शिस्तपालन समितीने त्यांच्या उत्तरांची तपासणी केली आणि असे आढळून आले की, दोन्ही कुस्तीपटूंनी आंतरराष्ट्रीय स्तरावर चांगली कामगिरी केली आहे. म्हणून समितीने त्यांच्या मागील कामगिरीचा विचार करून त्यांच्याशी सौम्य दृष्टिकोन ठेवण्याची शिफारस केली. WFI अध्यक्ष संजय कुमार सिंग यांनी शिफारस स्वीकारली आणि त्यांचे निलंबन मागे घेण्याचा आणि भविष्यातील सर्व स्पर्धांमध्ये भाग घेण्याची परवानगी देण्याचा आदेश जारी केला. पण वजन व्यवस्थापन किंवा शिस्तीशी संबंधित कोणत्याही वारंवार उल्लंघनांवर कठोर शिस्तभंगाची कारवाई केली जाईल असा इशारा फेडरेशनने दिला आहे.

---------------

हिंदुस्थान समाचार / वृषाली देशपांडे