वॉशिंग्टन , 16 नोव्हेंबर (हिं.स.)।ब्रिटनची प्रसिद्ध मीडिया कंपनी बीबीसीला अमेरिकेचे राष्ट्राध्यक्ष डोनाल्ड ट्रम्प यांच्याकडून माफी मागूनही कोणतीही सुट मिळालेली नाही. ट्रम्प यांनी जाहीर केले आहे की बीबीसीने माफी मागितली असली तरी ते ब्रिटनच्या सार्वजनिक सेवा प्रसारक बीबीसीविरुद्ध कायदेशीर कारवाई सुरूच ठेवणार आहेत. त्यांनी म्हटले की गेल्या वर्षी प्रसारित केलेल्या एका वृत्त-चित्रपटात त्यांच्या भाषणाचे संपादन ज्या प्रकारे करण्यात आले, त्याबद्दल बीबीसीने अलीकडेच माफी मागितली असली तरीही — “आम्ही त्यांच्यावर खटला भरूच.”
ट्रम्प म्हणाले, “आम्ही त्यांच्यावर (बीबीसीवर) 10 अब्ज ते 50 अब्ज डॉलर्सपर्यंतचा दावा करू — कदाचित पुढच्या आठवड्यात कधीही.” ते शनिवार रात्री एअर फोर्स वन मध्ये पत्रकारांशी बोलत होते. त्यांनी पुढे म्हटले, “आम्हाला हे करावेच लागेल. बीबीसीने कबूल केले आहे की त्यांनी फसवणूक केली. त्यांनी माझ्या तोंडून निघालेले शब्द बदलून टाकले.”
हा वाद बीबीसीसाठी अत्यंत तणावपूर्ण काळानंतर उद्भवला आहे, ज्यामध्ये काही वरिष्ठ अधिकाऱ्यांनी राजीनामे दिले आणि भारतीय वंशाचे चेअरमन समीर शाह यांनी “निर्णयातील चुकांबद्दल” माफी मागितली. गुरुवारी बीबीसीने कबूल केले की ट्रम्प यांच्या 6 जानेवारी 2021 च्या भाषणाचे संपादन अनवधानाने अशा प्रकारे झाले की जणू त्यांनी थेट हिंसेचे आवाहन केले होते, आणि हे फुटेज पुन्हा प्रसारित केले जाणार नाही.
जरी बीबीसीने अमेरिकेच्या राष्ट्राध्यक्षांची माफी मागितली असली, तरी कोणत्याही आर्थिक भरपाईला नकार दिला आहे. ट्रम्प यांनी कंपनीने खंडन आणि माफी जारी करून त्यांना नुकसानभरपाई न दिल्यास 10 अब्ज डॉलर्सच्या दाव्याची धमकी दिली होती. मात्र आता माफी मिळाल्यानंतरही ते कायदेशीर कारवाई सुरू ठेवण्याचा निर्धार त्यांनी व्यक्त केला आहे.
---------------
हिंदुस्थान समाचार / Priyanka Bansode
