कॅनबेरा, 5 नोव्हेंबर (हिं.स.) क्रिकेट ऑस्ट्रेलियाने इंग्लंड विरुद्धच्या २०२५-२६ च्या अ‍ॅशेस मालिकेतील पहिल्या कसोटीसाठी ऑस्ट्रेलियाच्या १५ सदस्यीय संघाची घोषणा केली आहे. अनुभवी फलंदाज मार्नस लाबुशेन संघात परतला आहे. तर युवा सलामीवीर सॅम कॉन्स्टॅडला वगळण्यात आले आहे. मुख्य निवडकर्ता जॉर्ज बेली यांनी संघाची घोषणा केली. जेक वेदरल्डने स्थानिक हंगामात आपल्या प्रभावी कामगिरीने निवडकर्त्यांचे लक्ष वेधले होते त्याला संघात देण्यात आले आहे.

नियमित ऑस्ट्रेलियन कर्णधार पॅट कमिन्स दुखापतीमुळे पहिल्या कसोटीतून बाहेर पडेल. ज्यामुळे स्टीव्ह स्मिथ संघाचे नेतृत्व करणार आहे. बेली म्हणाले, ऍशेस कसोटी मालिकेसाठी आम्ही उत्साहित आहोत. संघात चांगला समतोल आहे. क्रिकेटपटू स्थानिक हंगामापासून चांगल्या फॉर्ममध्ये येत आहेत.

३१ वर्षीय जेक वेदरल्ड गेल्या स्थानिक हंगामात शेफील्ड शिल्डमध्ये सर्वाधिक धावा करणारा फलंदाज होता. त्याने चालू हंगामात सातत्यपूर्ण कामगिरी सुरू ठेवली आहे. तो पहिल्या कसोटीत उस्मान ख्वाजासोबत डावाची सुरुवात करू शकतो. दरम्यान, पाच कसोटी सामने खेळलेल्या सॅम कॉन्स्टॅडला खराब फॉर्ममुळे संघातून वगळण्यात आले.

मार्नस लाबुशेनच्या देशांतर्गत क्रिकेटमध्ये सातत्यपूर्ण धावा केल्यामुळे त्याला संघात पुन्हा स्थान मिळाले आहे. तो टॉप ऑर्डरमध्ये महत्त्वाची भूमिका बजावू शकतो. अ‍ॅलेक्स कॅरीचा बॅकअप यष्टीरक्षक म्हणून काम करणारा जोश इंग्लिसलाही संघात स्थान देण्यात आले आहे.

ऑस्ट्रेलियन संघ अनुभव आणि तरुणाईच्या उत्साहाचे संतुलित मिश्रण आहे. स्मिथ, ख्वाजा, स्टार्क आणि लायन सारख्या अनुभवी क्रिकेटपटूंची उपस्थिती संघाला बळकटी देईल, तर लाबुशेन आणि वेदरल्ड नवीन हंगामात आपली छाप पाडण्यास सज्ज आहेत. इंग्लंडचा संघही संतुलित आहे आणि मालिका सुरू होण्यापूर्वीच उत्साह शिगेला पोहोचला आहे.

पहिल्या कसोटीसाठी ऑस्ट्रेलियाचा १५ जणांचा संघ

स्टीव्ह स्मिथ (कर्णधार), शॉन अ‍ॅबॉट, स्कॉट बोलँड, अ‍ॅलेक्स केरी, ब्रेंडन डॉगेट, कॅमेरॉन ग्रीन, जोश हेझलवुड, ट्रॅव्हिस हेड, जोश इंग्लिस, उस्मान ख्वाजा, मार्नस लाबुशेन, नॅथन लायन, मिशेल स्टार्क, जेक वेदरल्ड, ब्यू वेबस्टर

अ‍ॅशेससाठी इंग्लंडचा संघ

बेन स्टोक्स (कर्णधार), जोफ्रा आर्चर, गस अ‍ॅटकिन्सन, शोएब बशीर, जेकब बेथेल, हॅरी ब्रूक, ब्रायडन कार्स, झॅक क्रॉली, बेन डकेट, विल जॅक्स, ऑली पोप, मॅथ्यू पॉट्स, जो रूट, जेमी स्मिथ, जोश टंग, मार्क वूड

---------------

हिंदुस्थान समाचार / वृषाली देशपांडे