अमरावती, 7 नोव्हेंबर (हिं.स.)
राष्ट्रभावनेचा आणि देशभक्तीचा अद्वितीय संगम घडवून आणत आज अमरावती महानगरपालिकेत ‘वंदे मातरम्’ गीताच्या १५० व्या वर्धापन दिनानिमित्त एक भव्य कार्यक्रम पार पडला. विश्‍वरत्न डॉ. बाबासाहेब आंबेडकर सभागृहात सकाळी ११ वाजता झालेल्या या विशेष सोहळ्यात महानगरपालिकेचे अधिकारी, कर्मचारी आणि नागरिक मोठ्या उत्साहात सहभागी झाले.सर्व उपस्थितांनी एकसुरात “वंदे मातरम्” या राष्ट्रगीताचे सामूहिक गायन केले. सभागृहात देशभक्तीचा जयघोष घुमत असताना वातावरणात उत्साह, एकात्मता आणि अभिमानाची भावना दाटून आली.या प्रसंगी महानगरपालिका आयुक्त तथा प्रशासक सौम्‍या शर्मा चांडक यांनी मार्गदर्शन करताना सांगितले की, “‘वंदे मातरम्’ हे केवळ एक गीत नाही, तर ते आपल्या स्वातंत्र्य संग्रामाचे प्रेरणास्थान आहे. हे गीत आपल्याला राष्ट्रनिष्ठा, एकता आणि त्यागाची जाणीव करून देते. प्रत्येक भारतीयाने या गीताचा अभिमान बाळगावा आणि त्यातील मूल्ये आचरणात आणावीत.”कार्यक्रमाला अतिरिक्‍त आयुक्त महेश देशमुख, अतिरिक्‍त आयुक्त शिल्पा नाईक, उपायुक्‍त योगेश पिठे, उपायुक्‍त डॉ. मेघना वासनकर, मुख्‍यलेखापरिक्षक श्‍यामसुंदर देव, मुख्‍यलेखाधिकारी दत्‍तात्रय फिस्‍के, सहाय्यक नगर रचना अधिकारी सागर वानखडे, शहर अभियंता रविंद्र पवार, सहाय्यक आयुक्त भुषण पुसतकर, सहाय्यक आयुक्त नंदकिशोर तिखिले, वैद्यकीय आरोग्‍य अधिकारी डॉ.विशाल काळे, वैद्यकीय अधिकारी (स्‍वच्‍छता) डॉ.अजय जाधव, सहाय्यक आयुक्त श्रीकांतसिंह चौहान, शिक्षणाधिकारी डॉ.प्रकाश मेश्राम, अतिक्रमण विभागाचे सहाय्यक आयुक्त अविनाश रघटाटे, उद्यान अधिक्षक अजय विंचुरकर, सहाय्यक निवडणूक अधिकारी अक्षय निलंगे, उपअभियंता, अभियंता यांच्यासह अनेक अधिकारी, कर्मचारी आणि नागरिक उपस्थित होते.या उपक्रमातून अमरावती महानगरपालिकेने राष्ट्रगीताच्या गौरवशाली इतिहासाला अभिवादन करत, नागरिकांमध्ये देशभक्तीची भावना दृढ करण्याचा संदेश दिला. महानगरपालिका आयुक्त तथा प्रशासक सौम्‍या शर्मा चांडक यांनी या प्रसंगी आपल्या भाषणात सांगितले की, ‘वंदे मातरम्’ हे केवळ एक गीत नसून भारताच्या आत्म्याचे प्रतीक आहे. हे गीत राष्ट्रप्रेम, एकता आणि त्यागाच्या भावनेचे द्योतक असून स्वातंत्र्य संग्रामाच्या प्रत्येक टप्प्यावर याने असंख्य भारतीयांना प्रेरणा दिली.त्या म्हणाल्या, “आज आपण ज्या स्वातंत्र्याचा आणि प्रगतीचा आनंद घेतो, तो त्या वीरांच्या बलिदानामुळे शक्य झाला, ज्यांनी ‘वंदे मातरम्’च्या घोषणेतून प्रेरणा घेतली. या गीताचे उच्चारण हे मातृभूमीप्रतीच्या निष्ठेचे प्रतीक आहे. त्यामुळे प्रत्येक भारतीयाने या गीताचा अभिमान बाळगावा आणि त्यातील मूल्यांना आपल्या जीवनात उतरवावे.”आयुक्त सौम्‍या शर्मा चांडक यांनी पुढे सांगितले की, आजच्या आधुनिक युगात देशभक्तीची भावना जागविणे आणि युवकांना आपल्या सांस्कृतिक वारशाची जाणीव करून देणे अत्यंत आवश्यक आहे. “अशा सामूहिक उपक्रमांमधून राष्ट्रभावना अधिक दृढ होते आणि समाजात एकता, सौहार्द आणि आपलेपणा वाढतो,” असे त्या म्हणाल्या.त्यांनी सर्व अधिकारी, कर्मचारी आणि नागरिकांचे या उपक्रमात सहभागी होऊन देशभक्तीचा संदेश दिल्याबद्दल अभिनंदन केले. “महानगरपालिका केवळ शहराच्या विकासासाठी नव्हे, तर नागरिकांच्या मनामनात राष्ट्रनिष्ठा आणि सामाजिक जबाबदारीची भावना रुजविण्यासाठीही कटिबद्ध आहे,” असे आयुक्तांनी नमूद केले.
---------------
हिंदुस्थान समाचार / अरुण जोशी
