पुणे, 9 नोव्हेंबर (हिं.स.)। राज्य सरकारने ‘पीएम ई-ड्राइव्ह’अंतर्गत ‘पीएमपी’ला देण्यात येणाऱ्या एक हजार ‘ई बस’साठी रिझर्व्ह बँकेला हमी दिली आहे. हमी मिळाल्याने अवजड उद्योग मंत्रालयाने ‘पीएमपी’ला पहिल्या टप्प्यात १२ मीटर लांबीच्या ८०० व ९ मीटर लांबीच्या २०० अशा मिळून एक हजार ‘ई बस’ देण्याचे मान्य केले आहे.

येत्या पाच ते सहा महिन्यांत ‘पीएमपी’ला एक हजार ‘ई बस’ मिळणार असल्याने सुमारे ८ ते १० लाख प्रवाशांची सोय होणार आहे. पूर्वी ‘पीएमपी’ला दुसऱ्या टप्प्यात एक हजार बस दिल्या जाणार होत्या, त्यामुळे बस मिळण्यास सुमारे वर्षभराचा कालावधी लागला असता. मात्र, पहिल्या टप्प्यात समावेश झाल्याने आता अवघ्या पाच महिन्यांतच ‘पीएमपी’च्या ताफ्यात एक हजार नवीन बस दाखल होतील.

‘पीएमपी’च्या ताफ्यात सध्या ४९० ई बस आहेत. २०१९ मध्ये या ई बसची खरेदी झाली आहे. २०२९ मध्ये या सर्व बसचे आयुर्मान संपणार आहे. शिवाय दरवर्षी १० वर्षे पूर्ण होणाऱ्या बसला प्रवासी सेवेतून बाहेर जावे लागणार आहे. अशा बसची संख्या २०० आहे. त्यामुळे एक हजार ई बस ‘पीएमपी’च्या ताफ्यात दाखल होत असल्याने बसची संख्या वाढणार आहे. एप्रिल-मे २६च्या दरम्यान या बस ताफ्यात दाखल होण्याची शक्यता आहे.

---------------

हिंदुस्थान समाचार / भूषण राजगुरु