रत्नागिरी, 9 नोव्हेंबर, (हिं. स.) : चिपळूण मतदारसंघातील ग्रामविकास योजनांना गती देण्यात आमदार शेखर निकम यांच्या पाठपुराव्याला मोठे यश मिळाले आहे. बाळासाहेब ठाकरे स्मृती मातोश्री ग्रामपंचायत बांधणी योजनेअंतर्गत दोन्ही तालुक्यांमधील पाच ग्रामपंचायतींच्या इमारतींसाठी एक कोटीचा निधी मंजूर झाला आहे.

निधी मंजूर झालेल्या ग्रामपंचायतींमध्ये चिपळूण तालुक्यातील तिवरे, निरबाडे, वालोटी आणि संगमेश्वर तालुक्यातील किरडुवे व फणसवळे या गावांसाठी हा निधी मंजूर करण्यात आला आहे. शासनाच्या या निर्णयामुळे संबंधित गावांमधील प्रशासनिक कार्यकाल अधिक सुसूत्र, पारदर्शक आणि नागरिकांना सुलभ होणार आहे. गावपातळीवरील लोकाभिमुख सुविधा उपलब्ध करून देणे आणि ग्रामीण पायाभूत सुविधांना बळकटी मिळण्यास मदत होणार आहे.

मतदारसंघात विविध विकासकामांसाठी आमदार निकम सातत्याने पाठपुरावा करत असून, त्याचे फलित म्हणून रस्ते, पाणीपुरवठा, आरोग्य, शिक्षण आणि ग्रामविकासाशी संबंधित कामांना गती प्राप्त झाली आहे.

---------------

हिंदुस्थान समाचार / रत्नागिरी