सोलापूर, 10 डिसेंबर, (हिं.स.)। आगामी सोलापूर महानगरपालिका निवडणुकीत महाविकास आघाडी एकजूट होऊन निवडणूक लढवणार असून, महापालिकेवर आघाडीचा महापौर बसवण्याचा ठाम निर्धार आज झालेल्या महत्त्वाच्या बैठकीत आघाडीतील नेत्यांनी व्यक्त केला. ही बैठक सोलापूर येथील शासकीय विश्रामगृहात पार पडली. या बैठकीत काँग्रेस शरदचंद्र पवार राष्ट्रवादी काँग्रेस उद्धव बाळासाहेब ठाकरे शिवसेना आणि महाराष्ट्र नवनिर्माण सेनेचे पदाधिकारी एकत्र दिसून आले पण एमआयएम हा पक्ष महाविकास आघाडीमध्ये सहभागी होतो की नाही हे सुद्धा पाणी तितकेच महत्त्वाचे आहे.बैठकीसाठी शिवसेना (उद्धव बाळासाहेब ठाकरे) पक्षाचे वरिष्ठ नेते चंद्रकांत खैरे सोलापुरात दाखल झाले होते.बैठकीनंतर आयोजित पत्रकार परिषदेत बोलताना खैरे म्हणाले, भाजपच्या विरोधात येऊ इच्छिणाऱ्या सर्व पक्षांना महाविकास आघाडी सोबत घेणार आहे. सोलापूर महानगरपालिका निवडणूक संयुक्तपणे लढून आघाडीचा महापौर बसवणे हेच आमचे मुख्य लक्ष्य आहे. त्यासाठी सर्व घटक पक्षांनी आपापली पूर्ण ताकद पणाला लावणे गरजेचे आहे.

तसेच त्यांनी वंचित बहुजन आघाडी आणि समाजवादी पार्टीलाही सोबत घेण्याचा मनोदय व्यक्त केला.बैठकीस माजी आमदार प्रकाश यलगुलवार, काँग्रेस शहराध्यक्ष चेतन नरोटे, माजी महापौर संजय हेमगड्डी, प्रवक्ते अशोक निंबर्गी, राष्ट्रवादी शरदचंद्र पवार पक्षाचे शहराध्यक्ष महेश गादेकर, शंकर पाटील, शिवसेना उपनेत्या अस्मिता गायकवाड, शिवसेना उपजिल्हाप्रमुख अजय दासरी, गणेश वानकर, धनंजय डिकोळे, संतोष पाटील, उपजिल्हाप्रमुख दत्तात्रय गणेशकर, शहर प्रमुख नाना मोरे, तसेच माकपचे युसुफ शेख मेजर, अनिल वासम, मनसेचे विनायक महिंद्रकर, जैनुद्दीन शेख, प्रशांत इंगळे, तिरुपती परकीपंडला यांच्यासह महाविकास आघाडीचे पदाधिकारी आणि कार्यकर्ते मोठ्या संख्येने उपस्थित होते.

---------------

हिंदुस्थान समाचार / यशपाल गायकवाड