मुंबई, १८ डिसेंबर (हिं.स.) : मुंबई उच्च न्यायालयासह वांद्रे न्यायालय बॉम्बने उडवण्याची धमकी देण्यात आली आहे. महत्वाचे म्हणजे या आधी आजचं सकाळी नागपूर जिल्हा आणि सत्र न्यायालयांना बॉम्बने उडवण्याची धमकी ईमेलद्वारे मिळाली. या पार्श्वभूमीवर तपास यंत्रणा सतर्क झाल्या आणि परिसरात सुरक्षा व्यवस्था वाढवत शोध मोहीम राबविण्यात आली.

मिळालेल्या माहितीनुसार, आज, गुरुवारी वांद्रे न्यायालयाला एका ईमेलद्वारे बॉम्बने उडवून देण्याची धमकी मिळाली. या धमकीचा मेल आल्यानंतर स्थानिक पोलिस पथके आणि बॉम्ब शोधक आणि नाशक पथके घटनास्थळी दाखल झाली. खबरदारीचा उपाय म्हणून, न्यायालयीन कामकाज स्थगित करण्यात आले आणि वकील, कर्मचारी आणि अभ्यागतांच्या सुरक्षिततेसाठी प्रभावित न्यायालय परिसर रिकामा करण्यात आला. शिवाय, पोलिस अधिकाऱ्यांनी या परिसरांना वेढा घातला होता आणि सुरक्षा व्यवस्था कडक केली आहे, तर सायबर पथके धमकी देणाऱ्या ई-मेलचा स्त्रोत शोधण्यासाठी कामी लागले.आतून कोणालाही बाहेर जाण्याची परवानगी नाही आणि बाहेरून कोणालाही आत येण्याची परवानगी नाही, तरीही परिसरातील परिस्थिती चिंताजनक असल्याचे समोर आले आहे.

दुसरीकडे नागपूर जिल्हा आणि सत्र न्यायालयाला इमारतीच्या आत बॉम्ब असल्याचा दावा करणारा ईमेल मिळाला. या धमकीमुळे स्थानिक पोलीस तातडीने घटनास्थळी पोहचले आणि परिसराची पाहणी सुरु केली मात्र अद्याप कोणतीही संशयास्पद वस्तू आढळलेली नाही असं पोलिसांनी म्हटलं आहे.

जिल्हा बार असोसिएशनचे अध्यक्ष रोशन बागडे यांनी सांगितले की, सकाळी न्यायालयाच्या ईमेल आयडीवरून ईमेल पाठवण्यात आला होता, ज्यामध्ये दावा करण्यात आला होता की सिव्हिल लाईन्स परिसरात असलेल्या इमारतीत लवकरच दोन आरडीएक्स आधारित स्फोटक उपकरणे स्फोट होतील. दरम्यान एका अधिकाऱ्याने सांगितले की, जिल्हा न्यायालयात सुरक्षा वाढवण्यात आली आहे आणि बॉम्ब शोधक आणि निकामी पथकाचे कर्मचारी परिसराची तपासणी करत आहेत.

---------------

हिंदुस्थान समाचार / सुधांशू जोशी