मॉस्को , 28 डिसेंबर (हिं.स.)।रशिया-युक्रेन युद्धाला बराच काळ लोटला असला तरी दोन्ही देशांमधील हा संघर्ष संपण्याची चिन्हे दिसत नाहीत. अशा परिस्थितीत रशियाचे राष्ट्राध्यक्ष व्लादिमीर पुतिन यांनी शनिवारी (27 नोव्हेंबर) युक्रेनला इशारा देत म्हटले की, कीव दोन्ही देशांमधील संघर्ष शांततापूर्ण मार्गाने संपवण्याबाबत कोणतीही घाई दाखवत नाही. जर युक्रेनला शांततापूर्ण तोडगा नको असेल, तर रशिया आपल्या “विशेष लष्करी मोहिमे”च्या माध्यमातून सर्व उद्दिष्टे साध्य करेल.

एका वृत्तसंस्थेच्या हवाल्याने सांगण्यात आले की, हे वक्तव्य रशियाने कीववर पहाटे सुमारे 500 ड्रोन आणि 40 क्षेपणास्त्रे डागल्यानंतर एका दिवसाने आले आहे. या हल्ल्यात किमान एका व्यक्तीचा मृत्यू झाला असून सुमारे 27 जण जखमी झाले आहेत.

दरम्यान, युक्रेनचे राष्ट्राध्यक्ष वोलोडिमिर झेलेन्स्की रविवारी फ्लोरिडामध्ये डोनाल्ड ट्रम्प यांची भेट घेणार आहेत. या भेटीत गेल्या सुमारे चार वर्षांपासून सुरू असलेल्या रशिया-युक्रेन संघर्षाचा शेवट कसा करता येईल, यावर पुढील चर्चा होणार आहे. झेलेन्स्की यांनी सांगितले की, कीव आणि त्याच्या आसपासच्या भागांवर 10 तास चाललेली बॉम्बहल्ल्यांची मालिका ही आमच्या शांतता प्रयत्नांना रशियाकडून दिलेले उत्तर होते.

या भेटीदरम्यान दोन्ही नेते डोनेट्स्क आणि झापोरिझिया या भागांमधील सुरक्षा हमी, प्रादेशिक मुद्दे तसेच इतर अनेक विषयांवर चर्चा करण्याची योजना आखत आहेत.

---------------

हिंदुस्थान समाचार / Priyanka Bansode