इस्लामाबाद, 28 डिसेंबर (हिं.स.)। ‘ऑपरेशन सिंदूर’ मोहिमेत भारताने पाकिस्तानच्या आत प्रवेश करून दहशतवाद्यांवर अचूक हल्ले केले होते. पाकिस्तानी लष्कराच्या विनंतीनंतरच भारताने शस्त्रसंधी मान्य केली होती, मात्र अधिकृत पातळीवर पाकिस्तान या सर्व बाबी नाकारत आला आहे. अशा परिस्थितीत आता ‘ऑपरेशन सिंदूर’ संदर्भात पाकिस्तानच्या राष्ट्राध्यक्षांचे कबुलीजबाब समोर आले आहेत. आसिफ अली झरदारी यांनी स्वतःच या मोहिमेबाबत सर्व सत्य उघड केले आहे.

पाकिस्तानमधील एका कार्यक्रमात भाषण करताना झरदारी म्हणाले की, “माझा एक प्रतिनिधी माझ्याकडे येऊन म्हणाला, ‘सर, युद्ध सुरू झाले आहे.’” पुढे ते म्हणाले, “खरे तर मी त्याला चार दिवस आधीच सांगितले होते की युद्ध होणार आहे.” झरदारी यांनी सांगितले की त्यांच्या प्रतिनिधीने पुढे असेही सांगितले, “सर, युद्ध सुरू झाले आहे, बंकरमध्ये चला.”

आपल्या भाषणात झरदारी पुढे म्हणाले की, “आम्ही युद्धाच्या मैदानासाठी स्वतः तयार आहोत. आम्ही स्वतः शस्त्रे घेऊन लढण्यासाठी तयार आहोत. गरज पडल्यास आपल्या प्राणांची आहुती देण्यासाठीही आम्ही सज्ज आहोत.”

झरदारी यांच्या या वक्तव्यावरून स्पष्ट होते की, पाकिस्तानी सेनेतील अनेक वरिष्ठ अधिकारीही आपला जीव वाचवण्यासाठी बंकरमध्ये लपून बसले होते. ‘ऑपरेशन सिंदूर’दरम्यान अनेक दिवस पाकिस्तानी लष्करप्रमुख असीम मुनीरही सार्वजनिकपणे दिसत नव्हते.

---------------

हिंदुस्थान समाचार / Priyanka Bansode