दोहा, 30 डिसेंबर (हिं.स.) पराभवानंतर मॅग्नस कार्लसनचा संयम सुटल्याची चर्चा अनेकदा केली जाते. जूनमध्ये नॉर्वे बुद्धिबळात जागतिक विजेता डी. गुकेशकडून झालेल्या पराभवानंतर हे स्पष्ट झाले. आता दोहा येथे सुरू असलेल्या FIDE जागतिक ब्लिट्झ चॅम्पियनशिपमध्ये भारतीय ग्रँडमास्टर अर्जुन एरिगाईसीकडून पराभव झाल्यानंतर कार्लसन पुन्हा एकदा संतापाच्या भरात दिसला. एरिगाईसीने शेवटच्या गेममध्ये चांगला खेळ केला. त्याने केवळ विद्यमान ब्लिट्झ चॅम्पियन कार्लसनलाच नव्हे तर प्रसिद्ध ग्रँडमास्टर नोडिरबेक अब्दुसत्तोरोव्हलाही पराभूत केले.

११ फेऱ्यांनंतर, एरिगाईसी फ्रान्सच्या मॅक्सिम वाचियर-लाग्रेव्हसह नऊ गुणांसह संयुक्त आघाडीवर होता. दिवसाचे अजून दोन फेरे शिल्लक असले तरी आणि जागतिक क्रमवारीत अव्वल क्रमांकावर असलेल्या कार्लसनला पुनरागमन करण्याची संधी होती. पण एरिगाईसीविरुद्धचा पराभव त्याला हाताळणे कठीण झाले. सामन्यानंतर त्याने टेबलावर जोरात हात आपटला. याचा व्हिडिओ सोशल मीडियावर झपाट्याने व्हायरल झाला आहे. आणि नेटकऱ्यांनी त्याला कार्लसनचा अँगर २.० असे संबोधले आहे.

डॅनिल दुबोव, अमेरिकन जीएम फॅबियानो कारुआना आणि चीनचा यू यांगी हे प्रत्येकी ८.५ गुणांसह संयुक्त आघाडीवर आहेत. आठ खेळाडूंचा गट, ज्यामध्ये कार्लसन, जेतेपदाचे दावेदार अलिरेझा फिरोजा आणि भारताचा सुनील दत्त नारायणन यांचा समावेश आहे, आठ गुणांसह सहाव्या स्थानावर आहे. आर. प्रज्ञानंद आणि डी. गुकेश ७.५ गुणांसह १४ व्या स्थानावर आहेत.

२२ वर्षीय एरिगाईसीने आठ विजय, दोन अनिर्णित आणि एक पराभवासह दमदार सुरुवात केली. त्याचा सर्वात महत्त्वाचा विजय नवव्या फेरीत काळ्या मोहऱ्यांसह कार्लसनविरुद्ध होता. त्यानंतर त्याने दहाव्या फेरीत अब्दुसत्तोरोव्हला हरवून अर्ध्या गुणांची आघाडी घेतली. या वर्षी, त्याने नॉर्वे बुद्धिबळ (शास्त्रीय) ते ब्लिट्झ पर्यंत विविध स्वरूपात कार्लसनला आव्हान देण्याची आणि पराभूत करण्याची क्षमता दाखवली आहे. ११ व्या फेरीत, एरिगासीने कारुआनाविरुद्ध बरोबरी साधली. स्पर्धेच्या शेवटच्या दिवशी (१४ ते १९ फेरी), अव्वल चार खेळाडू उपांत्य फेरीत पोहोचतील.

---------------

हिंदुस्थान समाचार / वृषाली देशपांडे