ढाका , 31 डिसेंबर (हिं.स.)।बांगलादेशमधील चर्चेत असलेल्या उस्मान हादी हत्या प्रकरणात एक नवा वळण समोर आला आहे. या प्रकरणातील मुख्य आरोपींपैकी एक असलेल्या फैसल करीम मसूद यांनी एक व्हिडीओ जारी करत आपण भारतामध्ये नसून दुबईमध्ये असल्याचे स्पष्ट केले आहे. त्यांनी या हत्येशी कोणत्याही प्रकारचा संबंध असल्याचे फेटाळून लावत स्वतःला निर्दोष असल्याचे सांगितले असून, आपल्यावर आणि आपल्या कुटुंबावर खोटे आरोप केले जात असल्याचा दावा केला आहे.
समोर आलेल्या व्हिडीओमध्ये फैसल करीम मसूद म्हणाला की, त्यांनी उस्मान हादी यांची हत्या केलेली नाही तसेच या घटनेशी त्यांचा कोणताही संबंध नाही. त्यांच्या म्हणण्यानुसार, स्वतःच्या जीवित सुरक्षेच्या कारणास्तव ते दुबईला गेले होते. फैसल यांनी असा दावाही केला की या हत्येमागे इतर राजकीय कारणे असू शकतात.फैसल यांनी व्हिडीओमध्ये सांगितले की, उस्मान हादी यांचा संबंध जमात या संघटनेशी होता आणि कदाचित त्याच संघटनेशी संबंधित काही लोकांनी हा हल्ला केला असावा. या प्रकरणात आपले नाव चुकीच्या पद्धतीने गोवले जात असल्याचेही त्यांनी म्हटले आहे. आरोपीच्या म्हणण्यानुसार, उस्मान हादी यांच्याशी त्यांचा संपर्क फक्त व्यावसायिक गरजांपुरताच मर्यादित होता.
फैसल करीम मसूद हे एका आयटी कंपनीचे मालक असून, त्यांनी राजकीय देणगी दिल्याची कबुली दिली आहे. मात्र ही देणगी पूर्णपणे कायदेशीर आणि व्यावसायिक कारणांसाठी होती, कोणत्याही गुन्हेगारी कटाचा त्यात सहभाग नव्हता, असे त्यांनी स्पष्ट केले आहे.ढाका मेट्रोपॉलिटन पोलिसांनी यापूर्वी दावा केला होता की फैसल करीम मसूद भारतात पळून गेला असून, हलुआघाट सीमेद्वारे त्याने भारतात प्रवेश केला आहे. मात्र, नंतर मेघालयमध्ये तैनात असलेल्या बीएसएफच्या आयजी यांनी हा दावा फेटाळून लावत, सीमापार केल्याचा कोणताही पुरावा आढळलेला नसल्याचे सांगितले होते.मीडिया अहवालांनुसार, उपलब्ध कागदपत्रांवरून सध्या फैसल करीम मसूद दुबईमध्ये असल्याची पुष्टी झाली आहे. सूत्रांच्या माहितीनुसार, त्यांच्याकडे डिसेंबर 2022 मध्ये जारी करण्यात आलेला पाच वर्षांचा मल्टी-एंट्री यूएई व्हिसा असून, त्यासाठी त्यांनी स्वतः खर्च केला होता.
उल्लेखनीय म्हणजे, 12 डिसेंबर रोजी ढाकामध्ये निवडणूक प्रचारादरम्यान उस्मान हादी यांच्यावर गोळीबार करण्यात आला होता. उपचारासाठी त्यांना सिंगापूरला नेण्यात आले होते, मात्र 18 डिसेंबर रोजी त्यांचा मृत्यू झाला. उस्मान हादी हे ‘इंकलाब मंच’चे प्रवक्ते होते आणि अलीकडील जनआंदोलनानंतर एक प्रभावशाली युवा नेता म्हणून उदयास आले होते. आगामी संसदीय निवडणुकीत ते उमेदवारही होते.
---------------
हिंदुस्थान समाचार / Priyanka Bansode
