इस्लामाबाद, 31 डिसेंबर (हिं.स.)।प्रादेशिक व्यापाराला चालना देणारी पाकिस्तान–ईराण–तुर्किये मालगाडी सेवा सुरक्षा मंजुरी न मिळाल्यामुळे पुन्हा एकदा पुढे ढकलण्यात आली आहे. पाकिस्तान रेल्वेच्या वरिष्ठ अधिकाऱ्यांच्या माहितीनुसार, बुधवारी सुरू होणारी ही सेवा सुरक्षेशी संबंधित चिंतेमुळे सध्या स्थगित ठेवण्यात आली आहे.

२००९ मध्ये प्रायोगिक तत्त्वावर सुरू झालेली ही मालगाडी सेवा तेहरानकडे जाताना बलुचिस्तान प्रांतातून जाते. तेव्हापासून आजपर्यंत या सेवेचे संचालन अनेकदा सुरू झाले आणि पुन्हा थांबवण्यात आले आहे. यासंदर्भात कराची विभागातील पाकिस्तान रेल्वेचे मंडल अधीक्षक महमूद उर रहमान लखो यांनी माध्यमांना सांगितले की, संबंधित अधिकाऱ्यांकडून सुरक्षा मंजुरी न मिळाल्यामुळे बुधवारी ही सेवा पुन्हा सुरू करता आली नाही.

दरम्यान, पाकिस्तानचे रेल्वे मंत्री हनीफ अब्बासी आणि इस्लामाबादमधील ईराणचे राजदूत रजा अमीरी यांनी अलीकडेच ही मालगाडी सेवा ३१ डिसेंबरपासून पुन्हा सुरू केली जाईल, अशी घोषणा केली होती. मात्र, प्रत्यक्षात सुरक्षा अडथळ्यांमुळे ती शक्य झालेली नाही. उल्लेखनीय म्हणजे, या सेवेला याआधीही कार्यक्षमता, सीमाशुल्क, पायाभूत सुविधा आणि सुरक्षा यांसारख्या अनेक अडचणींचा सामना करावा लागला आहे. ही सेवा २०११ मध्ये थांबवण्यात आली, २०२१ मध्ये पुन्हा सुरू करण्यात आली, मात्र २०२२ मध्ये पुन्हा स्थगित करण्यात आली होती.

बलुचिस्तानमध्ये बंडखोर गटांकडून होत असलेल्या हिंसक दहशतवादी हल्ल्यांमुळे परिस्थिती तणावपूर्ण आहे. मागील वर्षापासून या हल्ल्यांमध्ये वाढ झाली असून, यावर्षी क्वेटा मार्गावरील प्रवासी गाड्या बंडखोरांचे नियमित लक्ष्य ठरल्या आहेत. सुरक्षा मंजुरीला होणाऱ्या विलंबामुळे रेल्वे प्रशासनाला जाफर एक्सप्रेससारख्या प्रवासी रेल्वे सेवाही स्थगित कराव्या लागल्या आहेत.

---------------

हिंदुस्थान समाचार / Priyanka Bansode