कोलकाता, ४ डिसेंबर (हिं.स.) : पश्चिम बंगालमधील राजकीय गोंधळाच्या पार्श्वभूमीवर तृणमूल काँग्रेसने एक मोठे पाऊल उचलले आहे. भरतपूरचे आमदार हुमायून कबीर यांना पक्षातून आजीवन निलंबित केले आहे. कोलकात्याचे महापौर आणि नगरविकास मंत्री फिरहाद हकीम यांनी गुरुवारी पत्रकार परिषदेत ही घोषणा केली.

फिरहाद हकीम यांनी सांगितले की, हुमायून कबीर यांचे आता तृणमूल काँग्रेसशी कोणतेही संबंध राहणार नाहीत. त्यांनी सांगितले की पक्ष धर्माच्या नावाखाली द्वेषाचे राजकारण मान्य करत नाही आणि अशा व्यक्तींशी कोणताही संबंध ठेवू शकत नाही. तृणमूलच्या प्रमुख ममता बॅनर्जी यांच्या मान्यतेनंतर पक्षाच्या शिस्तपालन समितीने ही कारवाई केल्याचेही मंत्र्यांनी सांगितले.

आमदार हुमायून कबीर अलीकडेच त्यांच्या वादग्रस्त वक्तव्यांमुळे चर्चेत आले आहेत. ६ डिसेंबर रोजी त्यांनी बेलडांगा येथे बाबरी मशिदीची पायाभरणी करण्याबाबत विधान केले, ज्यामुळे अचानक राजकीय वातावरण तापले. या विधानामुळे पक्षात अंतर्गत अस्वस्थता निर्माण झाली आणि निवडणुकीपूर्वी तृणमूल काँग्रेससाठी परिस्थिती अधिकाधिक कठीण होत चालली होती.

गेल्या काही महिन्यांपासून वक्फ दुरुस्ती विधेयकावरून जातीय तणाव आणि हिंसक निदर्शनांमुळे मुर्शिदाबाद संवेदनशील आहे. या पार्श्वभूमीवर, कबीर यांच्या वक्तव्यांमुळे पक्षाची निवडणूक रणनीती आणखी गुंतागुंतीची झाली.

---------------

हिंदुस्थान समाचार / वृषाली देशपांडे