नवी दिल्ली , 5 डिसेंबर (हिं.स.)।इंडिगो एअरलाइनचा ऑपरेशनल संकट आणखी काही दिवस सुरूच राहण्याची शक्यता आहे. त्यामुळे लाखो प्रवाशांना अडचणींचा सामना करावा लागणार आहे. एअरलाइनने मान्य केले आहे की त्यांना क्रू-संबंधित समस्येचा अंदाज आला नाही आणि नियोजनाच्या टप्प्यावर त्यांच्याकडून चूक झाली. आता एअरलाइनने सरकारकडे 10 फेब्रुवारीपर्यंत नियमांमध्ये शिथिलता देण्याची मुदत मागितली आहे.

एअरलाइनने म्हटले आहे की हिवाळ्यातील धुरकट वातावरण आणि गर्दीच्या काळात क्रूच्या कमतरतेची समस्या अधिकच गंभीर झाली. इंडिगोने सांगितले की वेळापत्रक स्थिर करण्याच्या प्रयत्नांना आणखी दोन-तीन दिवस लागू शकतात, ज्यामुळे काही अतिरिक्त उड्डाणे रद्द होतील. तथापि, 8 डिसेंबरपासून एअरलाइन आपल्या उड्डाण ऑपरेशन्समध्ये कपात करणार आहे, ज्यामुळे उड्डाणे रद्द होण्याची समस्या काही प्रमाणात कमी होऊ शकते.

एअरलाइनने सरकारकडे पायलटांच्या विश्रांती आणि रात्रीच्या ड्युटीशी संबंधित नियमांमध्ये 10 फेब्रुवारीपर्यंत शिथिलता देण्याची मागणी केली आहे. डीजीसीएनेही इंडिगोच्या या मागणीची पुष्टी केली आहे. डीजीसीएने एका निवेदनात म्हटले आहे की प्रवाशांच्या अडचणी कमी करण्यासाठी आणि सुरक्षा मानकांचे पालन राखण्यासाठी इंडिगोने एफडीटीएल नियमांमध्ये काही सवलती मागितल्या आहेत. इंडिगोने डीजीसीएला विश्वास दिला आहे की परिस्थिती सामान्य करण्यासाठी आवश्यक ते उपाय केले जात आहेत. दरम्यान, रात्रीच्या ड्युटीचे वेळापत्रक—जे मध्यरात्रीपासून सकाळी 5 वाजेपर्यंत होते ते बदलून मध्यरात्रीपासून सकाळी 6 वाजेपर्यंत करण्याचा निर्णय घेतला होता—तो काही काळासाठी मागे घेतला आहे. याशिवाय, रात्री दोन वेळा लँडिंगची मर्यादाही काही काळासाठी स्थगित करण्यात आली आहे.

नागरिक विमानन वाहतूक मंत्री राम मोहन नायडू यांनी मंत्रालयातील वरिष्ठ अधिकारी, डायरेक्टरेट जनरल ऑफ सिव्हिल एव्हिएशन (डीजीसीए), एअरपोर्ट्स अथॉरिटी ऑफ इंडिया (एएआय) आणि इंडिगोच्या वरिष्ठ अधिकाऱ्यांसह गुरुवारी रात्री बैठक घेऊन परिस्थितीचा आढावा घेतला. सरकारने सांगितले की नोव्हेंबरच्या अखेरीपासून देशभरात उड्डाणे रद्द होण्याचे प्रमाण मोठ्या प्रमाणात वाढल्यानंतर ती एअरलाइनच्या नेटवर्कवर बारकाईने लक्ष ठेवून आहे.

इंडिगो एअरलाइन दररोज 170 ते 200 उड्डाणे रद्द करत आहे, जे सामान्यपेक्षा खूप जास्त आहे. गेल्या दोन दिवसांत तर एअरलाइनने जवळपास 700 उड्डाणे रद्द केली आहेत. परिस्थिती लक्षात घेऊन डीजीसीए ने इंडिगोला अनेक सूचना दिल्या आहेत, ज्यामध्ये क्रूची नवीन भरती करणे, ऑपरेशन्स स्थिर करण्यासाठी योजना तयार करणे, क्रू उपलब्धता आणि शेड्युलिंगमध्ये सुधारणा करण्याबाबत दर पंधरवड्याला अहवाल देणे आणि ऑपरेशनल सामान्य करण्यासाठी आवश्यक सर्व एफडीटीएल सवलतींचा तपशील देणे यांचा समावेश आहे.

डीजीसीए ने सांगितले की पुढील काही दिवस इंडिगोच्या नेटवर्क परफॉर्मन्स आणि प्रवासी-व्यवस्थापन प्रणालीचे रिअल-टाईम मॉनिटरिंग सुरू ठेवले जाईल. तसेच विमानतळांवरील गर्दी हाताळण्यासाठी प्रवासी-व्यवस्थापन कर्मचाऱ्यांची संख्या वाढवण्याचे निर्देशही दिले आहेत, जेणेकरून सर्व प्रभावित टर्मिनल्सवरील सहाय्यक सेवांना अधिक मजबुती देता येईल.

---------------

हिंदुस्थान समाचार / Priyanka Bansode