नवी दिल्ली , 26 सप्टेंबर (हिं.स.)। देशाचे माजी पंतप्रधान डॉ. मनमोहन सिंग यांची आज जयंती आहे. या प्रसंगी पंतप्रधान नरेंद्र मोदी, कॉंग्रेस अध्यक्ष मल्लिकार्जुन खरगे, लोकसभेतील विरोधी पक्षनेते राहुल गांधी यांच्यासह अनेक नेत्यांनी त्यांना श्रद्धांजली अर्पण केली आणि देशासाठी त्यांच्या महत्त्वपूर्ण योगदानाची आठवण केली. मनमोहन सिंग यांचे निधन गेल्या वर्षी डिसेंबरमध्ये झाले होते.

पंतप्रधान नरेंद्र मोदींनी सोशल मीडिया प्लॅटफॉर्म ‘एक्स’वर पोस्ट करत लिहिले, “माजी पंतप्रधान डॉ. मनमोहन सिंग यांना त्यांच्या जयंतीनिमित्त श्रद्धांजली. त्यांच्या दीर्घ सार्वजनिक जीवनात राष्ट्रासाठी दिलेल्या योगदानाची आठवण आज आपण काढतो.”पंतप्रधान मोदींनी त्यांच्या पंतप्रधान आणि अर्थमंत्री म्हणून दिलेल्या योगदानाचे विशेषतः देशाच्या विकासासाठी महत्त्वाचे असल्याचे नमूद केले.

कॉंग्रेस अध्यक्ष मल्लिकार्जुन खरगे यांनी डॉ. सिंग यांना “भारतीय आर्थिक परिवर्तनाचे सौम्य शिल्पकार” असे संबोधले. त्यांनी ‘एक्स’ वर लिहिले, “डॉ. मनमोहन सिंग हे विनम्रता आणि बुद्धिमत्तेचे प्रतीक होते. त्यांनी नेहमीच आपल्या कृतींमधून ओळख निर्माण केली. त्यांनी केलेल्या आर्थिक सुधारणांमुळे नवीन संधी निर्माण झाल्या, समृद्ध मध्यमवर्गाचा उदय झाला आणि लाखो कुटुंबे दारिद्र्यातून बाहेर आली.”

खरगे पुढे म्हणाले, “मनमोहन सिंग न्याय आणि समावेशावर विश्वास ठेवणारे नेते होते. त्यांच्या धोरणांमुळे विकासासोबत दया आणि कल्याणकारी योजनाही जोडल्या गेल्या, ज्यामुळे कोट्यवधी लोकांच्या आयुष्यात सकारात्मक बदल झाला. सार्वजनिक जीवनात प्रामाणिकपणा आणि सचोटी केवळ शक्यच नाही, तर प्रभावीही असू शकते, याचे उदाहरण म्हणजे त्यांचे संपूर्ण जीवन आहे. त्यांच्या कार्याची परंपरा भविष्यातील पिढ्यांना एक समावेशक आणि सशक्त भारताचे स्वप्न दाखवत राहील.”

लोकसभेतील विरोधी पक्षनेते राहुल गांधी यांनी ‘एक्स’ वर लिहिले, “माजी पंतप्रधान डॉ. मनमोहन सिंग यांच्या जयंतीनिमित्त त्यांना विनम्र श्रद्धांजली. राष्ट्रनिर्माणासाठी त्यांची अटूट बांधिलकी, गरिबांसाठी घेतलेले धाडसी निर्णय, आणि मजबूत अर्थव्यवस्था घडवण्यासाठी त्यांचे ऐतिहासिक योगदान हे सर्व नेहमीच आपल्याला प्रेरणा देत राहील.” “त्यांचा साधेपणा, विनम्रता आणि प्रामाणिकपणा आपल्यासाठी सदैव प्रेरणास्थान राहील.”

डॉ. मनमोहन सिंग यांचा जन्म 26 सप्टेंबर 1932 रोजी अविभाजित पंजाबमधील गाह (सध्याचे पाकिस्तानात) येथे झाला होता. ते अत्यंत सामान्य कुटुंबातून येऊन, भारताच्या सर्वात प्रतिष्ठित अर्थशास्त्रज्ञांपैकी एक बनले आणि नंतर सार्वजनिक जीवनात प्रवेश केला. 1991 ते 1996 या काळात ते पी. व्ही. नरसिंहराव सरकारमध्ये अर्थमंत्री होते. या काळात त्यांनी आर्थिक उदारीकरणाची ऐतिहासिक सुरुवात केली, ज्यामुळे सरकारी नियंत्रण कमी झाले आणि भारताच्या विकासाचा एक नवा अध्याय सुरू झाला.यानंतर, 2004 ते 2014 या कालावधीत त्यांनी सतत दोन कार्यकाळ कॉंग्रेस नेतृत्वाखालील युपीए सरकारचे नेतृत्व केले.त्यांच्या नेतृत्वात देशाने आर्थिक प्रगती केली. अनेक कल्याणकारी योजना सुरू झाल्या. आणि समाजाच्या विविध स्तरांपर्यंत विकास पोहोचवला.

---------------

हिंदुस्थान समाचार / Priyanka Bansode