चेन्नई, २८ सप्टेंबर (हिं.स.)शनिवारी संध्याकाळी तमिळनाडूतील करूर येथे अभिनेता विजयच्या रॅलीत चेंगराचेंगरी झाली. मुख्यमंत्री स्टॅलिन यांच्या मते, या अपघातात १६ महिला आणि १० मुलांसह ३९ जणांचा मृत्यू झाला. ५१ जण आयसीयूमध्ये आहेत. मृतांचा आकडा आणखी वाढण्याची भीती व्यक्त केली जात आहे.

तमिळनाडू पोलिसांच्या मते, विजयच्या रॅलीसाठी १०,००० लोकांची परवानगी देण्यात आली होती. पण १,२०,००० चौरस फूट परिसरात ५०,००० हून अधिक लोक जमले होते. अभिनेता सहा तास उशिरा पोहोचला. विजयला ९ वर्षांची मुलगी बेपत्ता असल्याची माहिती मिळाली. त्यांनी स्टेजवरून तिला शोधण्याचे आवाहन केले. ज्यामुळे चेंगराचेंगरी झाल्याची माहिती आहे.

तमिळनाडूचे मुख्यमंत्री एमके स्टॅलिन यांनी रात्री उच्चस्तरीय बैठक घेतली आणि रात्री उशिरा करूर येथे पोहोचले. स्टॅलिन यांनी मृतांना श्रद्धांजली वाहण्यासाठी आणि जखमींना भेटण्यासाठी रुग्णालयात भेट दिली. दरम्यान, गृहमंत्रालयाने घटनेबाबत राज्य सरकारकडून अहवाल मागवला आहे. चेंगराचेंगरीत मृत्युमुखी पडलेल्यांच्या कुटुंबीयांना राज्य सरकारने प्रत्येकी १० लाख रुपयांची मदत जाहीर केली आहे.

अपघातानंतर अभिनेता विजय करूरहून थेट त्रिची विमानतळावर गेला आणि तेथून तो चेन्नईला रवाना झाला. तो जखमींना भेटला नाही किंवा सार्वजनिक सांत्वनही दिले नाही. तथापि, त्याने X वर लिहिले की, चेंगरीत झालेल्या मृत्यूंमुळे मी दु:खी झालो आहे. मला असह्य, अवर्णनीय वेदना आणि दुःख होत आहे. विजय यांनी चेंगराचेंगरीत मृत्युमुखी पडलेल्यांबद्दल शोक व्यक्त केला आणि रुग्णालयात उपचार घेणाऱ्यांच्या रुग्णांच्या प्रकृत्ती लवकर सुधारणा व्हावी यासाठी प्रार्थना केली आहे.

चेंगराचेंगरी प्रकरणी पोलिसांनी टीव्हीकेचे करूर पश्चिम जिल्हा सचिव व्हीपी मथियाझगन यांच्याविरुद्ध गुन्हा दाखल केला आहे. कार्यक्रमादरम्यान नियमांचे उल्लंघन केल्याबद्दल चार कलमांखाली गुन्हा दाखल करण्यात आला आहे.

पंतप्रधान नरेंद्र मोदी यांनी या घटनेबद्दल तीव्र शोक व्यक्त केला, मृतांच्या कुटुंबियांना सांत्वन दिले आणि जखमींना लवकर बरे होण्याची प्रार्थना केली आहे. पंतप्रधान नरेंद्र मोदी म्हणाले की, ही घटना अत्यंत दुःखद आहे. त्यांनी म्हटले की, ज्या कुटुंबांनी आपल्या प्रियजनांना गमावले त्यांच्यासोबत माझ्या संवेदना आहेत. या कठीण काळात देव त्यांना शक्ती देवो.

केंद्रीय गृहमंत्री अमित शहा यांनीही या अपघाताबद्दल तीव्र दुःख व्यक्त केले. शहा यांनी एक्स वर सांगितले की, या दुःखद घटनेने त्यांना खूप धक्का बसला आहे. त्यांनी मृतांच्या कुटुंबियांबद्दल मनापासून संवेदना व्यक्त केल्या आणि हे नुकसान सहन करण्याची शक्ती देवाला मिळावी अशी प्रार्थना केली.

---------------

हिंदुस्थान समाचार / वृषाली देशपांडे