नवी दिल्ली, 11 जानेवारी (हिं.स.)निखत जरीन आणि लव्हलिना बोरगोहेन यांनी राष्ट्रीय बॉक्सिंग चॅम्पियनशिपमध्ये महिला गटात सुवर्णपदके जिंकत आपली दमदार कामगिरी सुरू ठेवली. तर दुखापतीतून दीर्घकाळ बाहेर पडून परतणाऱ्या जागतिक अजिंक्यपद स्पर्धेतील कांस्यपदक विजेत्या मोहम्मद हुसामुद्दीनने पुरुषांच्या ६० किलो वजन गटात सुवर्णपदक पटकावले. आर्मी स्पोर्ट्स प्रमोशन बोर्ड (एसएससीबी) ने १२ सुवर्णपदकांसह गुणतालिकेत आपले वर्चस्व कायम ठेवले आहे. ज्यामध्ये पुरुषांच्या गटात नऊ सुवर्णपदके आहेत.

हुसामुद्दीनने अत्यंत चुरशीच्या अंतिम सामन्यात सहकारी आर्मी बॉक्सर आणि गतविजेता सचिन सिवाचचा ३-२ असा पराभव करून विजेतेपद पटकावले. त्याची सुरुवात खराब झाली पण त्याने उल्लेखनीय पुनरागमन केले. सुरुवातीला सचिनच्या बाजूने निकाल जाहीर झाल्यानंतर लढत संपल्यानंतर काही काळ गोंधळ उडाला. पण काही क्षणांनी तो दुरुस्त करण्यात आला.

विश्वचषक पदक विजेत्या जदुमणी सिंगने आपला प्रभावी फॉर्म सुरू ठेवत ५५ किलो वजन गटात सुवर्णपदक जिंकले. मणिपूरच्या २१ वर्षीय बॉक्सरने उपांत्य फेरीत दोन वेळा ऑलिंपियन आणि २०१९ च्या जागतिक अजिंक्यपद स्पर्धेत रौप्यपदक विजेता अमित पंघलचा पराभव केला. अंतिम फेरीत त्याने त्याचा आर्मी संघातील सहकारी पवन वर्तवालचा पराभव केला. आर्मीच्या आदित्य प्रतापने ६५ किलो वजनी गटाच्या अंतिम फेरीत गतविजेत्या हिमाचल प्रदेशच्या अभिनाश जामवालचा ३-२ असा पराभव करून मोठा धक्का दिला. गेल्या वर्षी विश्वचषकात तीन रौप्यपदके जिंकणाऱ्या जामवाल सातत्यपूर्ण कामगिरी करणाऱ्यांपैकी एक होती.

महिला गटात, तेलंगणाच्या निखतने ५१ किलो वजनी गटाच्या अंतिम फेरीत २०२३ च्या जागतिक विजेत्या हरियाणाच्या नीतू घनघासचा पराभव करून तिचे तिसरे राष्ट्रीय विजेतेपद पटकावले. टोकियो ऑलिंपिक कांस्यपदक विजेती लव्हलिनाने रेल्वेच्या सनमाचा चानूचा ५-० असा पराभव करून ७५ किलो वजनी गटाचे विजेतेपद पटकावले.

ऑल इंडिया पोलिसच्या विद्यमान विश्वविजेत्या मीनाक्षी हुडा (४८ किलो) हिने सुवर्णपदक जिंकण्यासाठी उत्कृष्ट कामगिरी केली. आर्मीच्या आशियाई क्रीडा स्पर्धेतील कांस्यपदक विजेती प्रीती पवारने ५४ किलो वजनी गटाचे विजेतेपद जिंकले आणि तिला चॅम्पियनशिपची सर्वोत्तम महिला बॉक्सर घोषित करण्यात आले. अनुभवी हरियाणा बॉक्सर पूजा राणीने ८० किलो वजनी गटाच्या अंतिम फेरीत तिची राज्य सहकारी नैना हिला ५-० असे पराभूत करत राष्ट्रीय अजिंक्यपद स्पर्धेत तिचे १० वे सुवर्णपदक पटकावले. इतर महिला सुवर्णपदक विजेत्यांमध्ये रेल्वे बॉक्सर प्राची (५७ किलो), प्रिया (६० किलो) आणि अल्फिया खान (८० किलोपेक्षा जास्त), आणि आर्मीच्या प्रांजल यादव (६५ किलो) आणि अरुंधती चौधरी (७० किलो) यांचा समावेश होता.

---------------

हिंदुस्थान समाचार / वृषाली देशपांडे