- सचिन आणि संगकाराचा विक्रम मोडीत

वडोदरा, 11 जानेवारी (हिं.स.)न्यूझीलंडविरुद्धच्या पहिल्या एकदिवसीय सामन्यात विराट कोहलीने आंतरराष्ट्रीय क्रिकेटमध्ये २८,००० धावा पूर्ण केल्या. न्यूझीलंडचा फिरकी गोलंदाज आदित्य अशोकच्या गोलंदाजीवर एक शॉट मारून त्याने ही ऐतिहासिक कामगिरी केली. यासह, कोहली सचिन तेंडुलकर आणि कुमार संगकारा नंतर आंतरराष्ट्रीय क्रिकेटमध्ये २८,००० धावा पूर्ण करणारा जगातील तिसरा फलंदाज बनला. विशेष म्हणजे कोहलीने केवळ ६२४ डावांमध्ये ही कामगिरी केली, ज्यामुळे तो हा आकडा गाठणारा सर्वात जलद फलंदाज बनला. सचिन तेंडुलकरने ६४४ डावांमध्ये हा टप्पा गाठला होता. तर, कुमार संगकाराने ६६६ डावांमध्ये हा टप्पा गाठला.

विराट कोहली यापूर्वी २५,०००, २६,००० आणि २७,००० आंतरराष्ट्रीय धावा पूर्ण करणारा सर्वात जलद फलंदाज ठरला होता. २०२५ कॅलेंडर वर्षाच्या अखेरीस एकदिवसीय क्रिकेटमध्ये त्याची कामगिरी प्रभावी राहिली आहे. दक्षिण आफ्रिकेविरुद्ध त्याने सलग दोन शतके आणि स्थानिक विजय हजारे ट्रॉफीमध्ये एक शतक आणि एक अर्धशतक हे त्याच्या उत्कृष्ट फॉर्मचे पुरावे आहेत. न्यूझीलंडविरुद्धच्या सामन्यात किंग कोहलीने ९३ चेंडूत ९१ धावांची धमाकेदार खेळी केली. पण तो शतकापासून वंचित राहिला.

कोहलीने २०२५ चा शेवट ५० षटकांच्या मजबूत फॉरमॅटसह केला. त्याने दक्षिण आफ्रिकेविरुद्ध सलग दोन शतके झळकावली. शेवटच्या एकदिवसीय सामन्यात त्याच्या अर्धशतकाने मालिका २-१ अशी जिंकली. त्यानंतर, विराटने विजय हजारे ट्रॉफीमध्ये दोन सामने खेळले, एका सामन्यात शतक आणि दुसऱ्या सामन्यात अर्धशतक झळकावले.

आंतरराष्ट्रीय क्रिकेटमध्ये सर्वाधिक धावा

सचिन तेंडुलकर: ३४,३५७ धावा

विराट कोहली: २८,०६८ धावा

कुमार संगकारा: २८,०१६ धावा

रिकी पॉन्टिंग: २७,४८३ धावा

सनथ जयसूर्या: २५,९५७ धावा

या सामन्यात ४२ धावा करून कोहलीने आणखी एक विक्रम प्रस्थापित केला. तो आता आंतरराष्ट्रीय क्रिकेटमध्ये सर्वाधिक धावा करणारा दुसऱ्या क्रमांकाचा फलंदाज बनला आहे. सचिन तेंडुलकर आता या यादीत अव्वल स्थानावर आहे. क्रिकेटचा देव म्हणून ओळखल्या जाणाऱ्या सचिनने ६६४ आंतरराष्ट्रीय सामन्यांमधील ७८२ डावांमध्ये ३४,३५७ धावा केल्या. आपल्या कारकिर्दीत तेंडुलकरने १०० शतके आणि १६४ अर्धशतके झळकावली आहेत. दरम्यान, या सामन्यात विराट कोहलीने ४४ चेंडूत आपले अर्धशतक पूर्ण केले. कोहलीने ९१ चेंडूत ९३ धावा केल्या त्यात आठ चौकार आणि एका षटकाराचा समावेश होता.

---------------

हिंदुस्थान समाचार / वृषाली देशपांडे