मुंबई, 12 जानेवारी (हिं.स.)। बिग बॉस मराठी'च्या सहाव्या पर्वाला रविवारपासून जोरादार सुरूवात झाली असून सर्व स्पर्धकांनी बिग बॉसच्या घरात प्रवेश केला आहे. या नवीन पर्वात सिनेसृष्टीतील लोकप्रिय 'चॉकलेट बॉय' अभिनेता राकेश बापट यानेही दिमाखदार एन्ट्री घेतली आहे.

राकेश बापटने रितेशसोबत बोलताना सांगितले की, त्याला अनेक वर्षांपासून मराठीत काम करायची इच्छा होती. योगायोगाने हिंदीत काम मिळत गेले. पण मराठीत मला खूप वर्षांपासून काम करायचं होतं. माझ्या आईला खूप इच्छा होती की मी माझ्या मातृभाषेत म्हणजे मराठीत काम करावं. मागच्या वर्षी तिचा ७५ वा वाढदिवस होता. तिला गिफ्ट म्हणून मी एक मराठी मालिका केली आणि प्रेक्षकांनीही त्यावर भरभरून प्रेम दिलं.

मकर संक्रांतीचा सण जवळ येत असल्याने,रितेश देशमुखसाठी राकेशच्या आईने खास तिळगुळ पाठवला होता. घरात प्रवेश करताना रितेशने राकेशसमोर दोन पर्याय ठेवले होते. मात्र, राकेशने कोणत्याही 'शॉर्टकट'चा विचार न करता 'मेहनतीचं दार' निवडलं.

दरम्यान, राकेश याआधी 'बिग बॉस हिंदी'मध्येही दिसला होता. त्यामुळे टास्कची रणनीती आणि घरातील राजकारण कसं हाताळायचं, याचा राकेशला चांगलाच अनुभव आहे. 'हिंदी बिग बॉस'मध्ये आपल्या संयमी स्वभावाने प्रेक्षकांची मनं जिंकल्यानंतर आता राकेश मराठी प्रेक्षकांचे मनोरंजन करण्यासाठी सज्ज झाला आहे. राकेशनं केलेली ही एन्ट्री 'बिग बॉस मराठी ६' मध्ये नवा रंग भरणारी ठरेल, यात शंका नाही. त्याची स्पष्ट भूमिका आणि आत्मविश्वास पुढील दिवसांत घरात कसं वातावरण निर्माण करणार, याकडे आता सगळ्यांचं लक्ष लागलं आहे.

---------------

हिंदुस्थान समाचार / Priyanka Bansode