नाशिक, 12 जानेवारी (हिं.स.)।

- अशोका युनिव्हर्सल स्कूल, अशोका मार्ग येथील इयत्ता ८ वीचा विद्यार्थी दिग्विजय गणेश सदाफळ याने U14 शालेय राष्ट्रीय बास्केटबॉल संघात निवड होऊन शाळेचा गौरव वाढवला आहे. दिग्विजयने स्कूल गेम्स फेडरेशन ऑफ इंडिया (SGFI) आयोजित राष्ट्रीय बास्केटबॉल अजिंक्यपद स्पर्धेत, जबलपूर येथे, महाराष्ट्र राज्याचे प्रतिनिधित्व केले. देशातील सर्वोत्तम खेळाडूंमध्ये खेळत त्याने राष्ट्रीय स्तरावर पाचवा क्रमांक पटकावला.

दिग्विजयची ही निवड त्याच्या सातत्यपूर्ण मेहनती, शिस्तबद्ध सराव आणि खेळावरील निष्ठेचा परिणाम आहे. गेल्या पाच वर्षांपासून तो शालेय बास्केटबॉल प्रशिक्षिका सौ. सारिता सोनावणे यांच्या मार्गदर्शनाखाली नियमित सराव करत असून, त्यांच्या तज्ज्ञ प्रशिक्षणामुळेच त्याचा क्रीडा प्रवास घडत गेला आहे.“दिग्विजयची ही कामगिरी ही शाळेच्या प्रतिभा जोपासण्याच्या आणि विद्यार्थ्यांना त्यांच्या क्षमता ओळखण्यासाठी विविध संधी उपलब्ध करून देण्याच्या वचनबद्धतेचे उत्तम उदाहरण आहे. त्याचा प्रवास अशोकातील सशक्त क्रीडा संस्कृतीचे प्रतीक आहे, जिथे आवड आणि संधी यांचा संगम होतो,” असे प्रतिपादन अशोका एज्युकेशन फाउंडेशनचे सचिव श्रीकांत शुक्ला यांनी दिग्विजयचे अभिनंदन करताना केले.

---------------

हिंदुस्थान समाचार / GOSAVI CHANDRASHEKHAR SUKDEV