जळगाव , 15 जानेवारी (हिं.स.)जळगाव महानगरपालिकेच्या सार्वत्रिक निवडणुकीसाठी आज सकाळी ७:३० वाजेपासून मतदान प्रक्रियेला सुरुवात झाली आहे. सकाळपासूनच मतदारांचा मोठा उत्साह पाहायला मिळत आहे. मात्र मतदानाचा काही तासातच एक धक्कादायक प्रकार समोर आला आहे.जळगाव शहरात बोगस मतदान केल्याच्या आरोपावरून एका तरुणाला चोप देण्यात आल्याची घटना घडली. पोलिसांनी वेळीच हस्तक्षेप केल्यामुळे पुढील अनर्थ टळला असून संबंधित तरुणाला पोलिसांनी ताब्यात घेतले आहे.

जळगाव शहरातील एका मतदान केंद्र परिसरात एक तरुण संशयास्पदरीत्या फिरत होता. तो बोगस मतदान करण्यासाठी आल्याचा काहींच्या लक्षात आल्याने यावरून बाचाबाची होऊन संतप्त नागरिकांनी त्या तरुणाला मतदान केंद्राच्या परिसरातच चोप दिला. पोलिसांनी वेळीच हस्तक्षेप केल्याने हा तरुण थोडक्यात बचावला आहे. पोलिसांनी त्याला ताब्यात घेतले असून पुढील चौकशीसाठी पोलीस स्टेशनला नेण्यात आले आहे. प्राथमिक चौकशीत समोर आलेल्या माहितीनुसार, हा तरुण चाळीसगाव तालुक्यातील रहिवासी असल्याचे समजते. तो या ठिकाणी मतदानासाठी का आला होता आणि त्याच्याकडे असणारी कागदपत्रे अधिकृत आहेत का, याचा तपास पोलीस करत आहेत.

---------------

हिंदुस्थान समाचार / मनोहर कांडेकर