नवी दिल्ली, 08 जानेवारी (हिं.स.) राष्ट्रीय पिस्तूल प्रशिक्षक अंकुश भारद्वाज यांच्यावर १७ वर्षीय राष्ट्रीय स्तरावरील महिला नेमबाजाचे लैंगिक शोषण केल्याचा आरोप आहे. प्रकरणाचे गांभीर्य लक्षात घेता, पोलिसांनी आरोपी प्रशिक्षकाविरुद्ध पोक्सो कायद्यांतर्गत गुन्हा दाखल केला आहे. शिवाय, राष्ट्रीय रायफल असोसिएशन ऑफ इंडिया (एनआरएआय) ने अंकुश भारद्वाज यांना निलंबित केले आहे.
मंगळवार, ६ जानेवारी २०२५ रोजी, १७ वर्षीय राष्ट्रीय महिला नेमबाजाच्या कुटुंबाने राष्ट्रीय नेमबाजी प्रशिक्षक अंकुश भारद्वाज यांच्याविरुद्ध एफआयआर दाखल केली. पोलीस सध्या या प्रकरणाची चौकशी करत आहेत. एफआयआरनुसार ही घटना नवी दिल्लीतील डॉ. करणी सिंग शूटिंग रेंजमध्ये राष्ट्रीय स्तरावरील नेमबाजी स्पर्धेदरम्यान घडली. असेही आरोप करण्यात आले आहेत की, जर तिने या घटनेबद्दल कोणालाही सांगितले तर प्रशिक्षकाने तिची कारकीर्द उद्ध्वस्त करण्याची आणि तिच्या कुटुंबाला हानी पोहोचवण्याची धमकी दिली. खेळाडूने धक्का बसलेल्या अवस्थेत हॉटेल सोडल्याची माहिती आहे आणि नंतर तिच्या कुटुंबाला घटनेबद्दल सांगितले. त्यानंतर कुटुंबाने अधिकृत पोलिस तक्रार दाखल केली.
दरम्यान, राष्ट्रीय रायफल असोसिएशन (एनआरएआय) चे सचिव पवन कुमार सिंग यांनी स्पष्टपणे सांगितले आहे की, प्रशिक्षक अंकुश भारद्वाज निलंबित राहतील आणि तपास पूर्ण होईपर्यंत त्यांना कोणतेही काम दिले जाणार नाही.
पोलिसांनी एनआयटी फरिदाबाद येथील महिला पोलिस ठाण्यात लैंगिक गुन्ह्यांपासून मुलांचे संरक्षण (पॉक्सो) कायद्याच्या कलम 6 आणि भारतीय दंड संहितेच्या कलम 351(2) अंतर्गत अंकुश भारद्वाजविरुद्ध गुन्हा दाखल केला आहे.
---------------
हिंदुस्थान समाचार / वृषाली देशपांडे
