रायगड, 28 फेब्रुवारी (हिं.स.)। अलिबागसह संपूर्ण रायगड जिल्ह्यात धुलिवंदनच्या पार्श्वभूमीवर बाजारपेठा रंगांनी न्हाऊन निघाल्या आहेत. होळीनंतर दुसऱ्या दिवशी साजऱ्या होणाऱ्या धुलिवंदन सणासाठी लागणारे पर्यावरणपूरक रंग आणि विविध आकारांच्या रंगीबेरंगी पिचकाऱ्या बाजारात मोठ्या प्रमाणात दाखल झाल्या आहेत. मात्र यंदा रंग व पिचकाऱ्यांच्या किंमतीत सरासरी पाच टक्क्यांची वाढ झाल्याने ग्राहकांना किंचित अधिक पैसे मोजावे लागत आहेत.

यंदा होळी सोमवारी (दि.२) असून त्यानंतर मंगळवारी (दि.३) धुलिवंदन साजरे केले जाणार आहे. ग्रामीण भागासह शहरी भागातही रंगांची उधळण करण्याची परंपरा उत्साहात पाळली जाते. त्यामुळे बाजारात साध्या पिचकाऱ्यांपासून बंदूक प्रकार, टँकर पिचकाऱ्या तसेच लहान मुलांसाठी आकर्षक डिझाइन उपलब्ध झाली आहेत. विशेष म्हणजे छोटा भीम, बेन 10 आणि बार्बी यांच्या चित्रांसह पिचकाऱ्यांना मोठी मागणी आहे.

पिचकाऱ्यांच्या किंमती १० रुपयांपासून ३०० रुपयांपर्यंत आहेत. काही ठिकाणी दर स्थिर असले तरी अनेक ठिकाणी ५ ते १० टक्क्यांनी वाढ झाल्याचे विक्रेत्यांनी सांगितले. कच्च्या मालाच्या वाढलेल्या किंमतीमुळे दरवाढ अपरिहार्य ठरल्याचे व्यापाऱ्यांचे म्हणणे आहे.

महागाईची झळ बसत असली तरी सणाचा उत्साह कमी झालेला नाही. अलिबागसह जिल्ह्यातील विविध बाजारपेठांत खरेदीला सुरुवात झाली असून सुमारे २५ टक्के खरेदी पूर्ण झाल्याचे विक्रेते संदेश तुणतुणे यांनी सांगितले. धुलिवंदनच्या आदल्या दोन दिवसांत ग्राहकांची मोठी गर्दी होण्याची शक्यता व्यक्त केली जात आहे.

---------------

हिंदुस्थान समाचार / संदेश साळुंके