– ब्लू कार्ड सर्वसाधारण प्रवाशांसाठी आणि ऑरेंज कार्ड मासिक पास वापरकर्त्यांसाठी उपलब्ध होणार
नवी दिल्ली, 01 मार्च (हिं.स.)। केंद्र सरकारच्या ‘वन नेशन, वन कार्ड’ या संकल्पनेतून प्रेरणा घेत दिल्लीतील रेखा गुप्ता सरकार राजधानीतील महिला रहिवाशांसाठी नॅशनल कॉमन मोबिलिटी कार्ड (एनसीएमसी) योजना सुरू करणार आहे. सोमवारी, २ मार्च रोजी इंदिरा गांधी इंडोर स्टेडियम येथे आयोजित ‘सशक्त नारी, समृद्ध दिल्ली’ या विशेष आणि भव्य कार्यक्रमात राष्ट्रपती द्रौपदी मुर्मू या या महत्त्वाकांक्षी योजनेचा (पिंक कार्ड) शुभारंभ करणार आहेत.
मुख्यमंत्री रेखा गुप्ता यांनी सांगितले की, या कार्डमुळे दिल्लीतील महिला रहिवाशांना डीटीसी बसमधून मोफत प्रवासाची सुविधा मिळेल. तसेच मेट्रो, रीजनल रॅपिड ट्रान्झिट सिस्टम (आरआरटीएस) आणि इतर सार्वजनिक वाहतूक सेवांमध्ये एकाच स्मार्ट कार्डद्वारे सशुल्क प्रवास करता येईल. मुख्यमंत्री यांच्या मते, ही योजना सार्वजनिक वाहतूक अधिक सुलभ, सुरक्षित आणि डिजिटल करण्याच्या दिशेने एक महत्त्वाचे पाऊल आहे. यामुळे महिलांच्या दैनंदिन प्रवास खर्चात बचत होईल आणि त्यांना शिक्षण, रोजगार, आरोग्य तसेच सामाजिक संधींमध्ये अधिक सुलभ प्रवेश मिळेल.
तीन प्रकारचे कार्ड जारी होणार
मुख्यमंत्री यांनी रविवारी प्रसिद्धीपत्रकाद्वारे माहिती दिली की, या योजनेअंतर्गत तीन प्रकारची एनसीएमसी कार्ड जारी केली जातील. पिंक कार्ड हे दिल्लीतील पात्र महिलांसाठी असेल, तर ब्लू कार्ड सर्वसाधारण प्रवाशांसाठी आणि ऑरेंज कार्ड मासिक पास वापरकर्त्यांसाठी दिले जाईल. प्रारंभी पिंक आणि ब्लू कार्ड सुरू करण्यात येतील, त्यानंतर ऑरेंज कार्ड लागू केले जाईल.
कार्ड वितरणासाठी दिल्ली ट्रान्सपोर्ट कॉर्पोरेशन (डीटीसी) यांनी हिंडन मर्केंटाइल लिमिटेड (मुफिनपे) आणि एअरटेल पेमेंट्स बँक लिमिटेड यांना अधिकृत केले आहे. ही कार्डे दिल्लीच्या सार्वजनिक वाहतूक व्यवस्थेत आधीपासून कार्यरत असलेल्या ऑटोमॅटिक फेअर कलेक्शन सिस्टम (एएफसीएस)शी एकत्रित केली जातील. पिंक कार्ड पात्र महिलांना पूर्णपणे मोफत दिले जाईल आणि त्याचा संपूर्ण खर्च दिल्ली सरकार उचलेल.
पिंक कार्ड कुठे मिळणार?
मुख्यमंत्री यांच्या माहितीनुसार, कार्ड वितरणासाठी सुमारे ५० केंद्रे स्थापन केली जाणार आहेत. यात जिल्हाधिकारी (डीएम) आणि उपविभागीय अधिकारी (एसडीएम) कार्यालयांसह डीटीसीची निवडक केंद्रे समाविष्ट असतील. कार्ड देण्याची प्रक्रिया कमीतकमी कागदपत्रांवर आधारित ठेवण्यात येईल, जेणेकरून ती सोपी, जलद आणि पारदर्शक राहील.
प्रत्येक पिंक कार्ड लाभार्थ्याच्या मोबाईल क्रमांक आणि आधार क्रमांकाशी जोडले जाईल. आधार प्रमाणीकरणाद्वारे वय (५ वर्षांपेक्षा जास्त), लिंग (महिला) आणि दिल्लीतील वास्तव्य (दिल्ली पिन कोडच्या आधारे) यांची खात्री केली जाईल. यामुळे पात्रता निश्चित होईल आणि डुप्लिकेशन टाळता येईल.
तिकिटांच्या जागी पिंक कार्ड
हे टच-फ्री आणि सुरक्षित स्मार्ट कार्ड असेल. प्रत्येक प्रवासाचा अचूक डिजिटल नोंदवहीत समावेश केला जाईल. रोख व्यवहार कमी होतील आणि उत्पन्नाचा हिशोब अधिक पारदर्शक राहील. प्रवासाच्या आकडेवारीच्या आधारे बस मार्ग निश्चित करणे, बसांची संख्या योग्य प्रमाणात ठेवणे आणि नियोजनात्मक निर्णय घेणे अधिक सोपे होईल. हेच कार्ड पिंक पेपर तिकिटांची जागा घेईल, ज्यामुळे संपूर्ण व्यवस्था अधिक सोपी, आधुनिक आणि डिजिटल बनेल.
---------------
हिंदुस्थान समाचार / Suraj Chaugule
