काबुल, 17 मार्च (हिं.स.) अफगाणिस्तानची राजधानी काबूलमध्ये झालेल्या मोठ्या हवाई हल्ल्यात किमान ४०० लोक ठार आणि २५० हून अधिक जखमी झाले. हा हल्ला स्थानिक वेळेनुसार रात्री ९ वाजण्याच्या सुमारास झाला. अफगाण सरकारचे उपप्रवक्ते हमदुल्ला फितरत यांच्या म्हणण्यानुसार, एका मोठ्या व्यसनमुक्ती रुग्णालयाला लक्ष्य करण्यात आले होते. मिळालेल्या माहितीनुसार, सुमारे २,००० खाटांच्या या रुग्णालयाचा मोठा भाग या हल्ल्यात उद्ध्वस्त झाला. या घटनेमुळे देशभरात संतापाची लाट उसळली असून, क्रीडा जगताने, विशेषतः अफगाण क्रिकेटपटूंनी तीव्र प्रतिक्रिया दिली आहे.

अफगाणिस्तानचा स्टार फिरकी गोलंदाज राशिद खानने सोशल मीडियावर या घटनेबद्दल आपला संताप व्यक्त केला. त्याने लिहिले, काबूलमधील पाकिस्तानी हवाई हल्ल्यामुळे झालेल्या नागरिकांच्या जीवितहानीच्या वृत्ताने मला खूप दुःख झाले आहे. नागरिकांची घरे, शैक्षणिक संस्था किंवा वैद्यकीय सुविधांना लक्ष्य करणे, मग ते हेतुपुरस्सर असो वा अपघाताने, हा एक युद्ध गुन्हा आहे.

राशिद पुढे म्हणाले, मानवी जीवनाप्रती अशी असंवेदनशीलता, विशेषतः रमजानच्या पवित्र महिन्यात, अत्यंत चिंताजनक आणि घृणास्पद आहे. यामुळे केवळ द्वेष आणि फूट वाढेल. मी संयुक्त राष्ट्र आणि मानवाधिकार संघटनांना आवाहन करतो की त्यांनी या घटनेची सखोल चौकशी करून गुन्हेगारांना जबाबदार धरावे. या कठीण काळात मी आमच्या अफगाण लोकांसोबत उभा आहे. आम्ही एक राष्ट्र म्हणून सावरू आणि पुन्हा उभे राहू.

अफगाणिस्तानचा माजी कॅप्टन मोहम्मद नबी यानेही या हल्ल्यावर तीव्र प्रतिक्रिया दिली. तो म्हणाला की, हा हल्ला उपचारासाठी रुग्णालयात दाखल झालेल्या नागरिकांना लक्ष्य करून करण्यात आला होता. नबीने लिहिले, काल रात्री काबूलमधील एका रुग्णालयात आशेचा किरण मावळला. उपचारासाठी आलेल्या तरुणांना पाकिस्तानी लष्करी राजवटीने केलेल्या बॉम्बस्फोटात ठार मारण्यात आले. रुग्णालयाबाहेर उभ्या असलेल्या माता आपल्या मुलांसाठी आक्रोश करत होत्या. रमजानच्या २८ व्या रात्री त्यांचे प्राण हिरावून घेण्यात आले.

---------------

हिंदुस्थान समाचार / वृषाली देशपांडे