नवी दिल्ली, 17 मार्च (हिं.स.)भारताचा टी-२० विश्वचषक विजेता हिरो संजू सॅमसनने सांगितले की, इंडियन प्रीमियर लीगमध्ये चेन्नई सुपर किंग्सकडून खेळताना भारताचा माजी कर्णधार महेंद्रसिंग धोनीकडून काही नव्या गोष्टी शिकण्यास तो उत्सुक आहे. सॅमसनने त्याचे बहुतेक आयपीएल सामने राजस्थान रॉयल्सकडून खेळले आहेत. पण आता तो चेन्नईमध्ये सामील झाला आहे. ३० मार्च रोजी गुवाहाटीमध्ये जेव्हा हे दोन संघ एकमेकांसमोर येतील, तेव्हा सॅमसन चेन्नईच्या जर्सीमध्ये दिसेल.

सॅमसन म्हणाला, मी माही भाई (धोनी) यांच्याशी फोनवर बोललो आहे, पण एका संघाचा भाग बनून त्यांच्यासोबत खेळणे खूप छान असेल. मी याकडे त्यांच्याकडून शिकण्याची एक संधी म्हणून पाहतो.

राजस्थान रॉयल्ससाठी हा घरच्या मैदानावरचा सामना असेल आणि सॅमसनने सांगितले की, तो या सामन्यात भावनांना स्वतःवर हावी होऊ देणार नाही. तो म्हणाला, मी चेन्नईकडून खेळण्यासाठी उत्सुक आहे. राजस्थान रॉयल्सविरुद्ध खेळण्याची ही माझी पहिलीच वेळ असेल, पण मी मैदानावर भावनांना माझ्यावर हावी होऊ देत नाही. मी राजस्थान रॉयल्स सोडले कारण मला वाटले की त्या संघासोबतचा माझा काळ संपला आहे. मी त्यांच्याविरुद्धही माझे सर्वोत्तम देण्याचा प्रयत्न करेन.

सॅमसन म्हणाला की, विश्वचषकापूर्वीच्या त्याच्या खराब कामगिरीमुळे त्याला आत्मपरीक्षण करण्याची संधी मिळाली. स्पर्धेतील सर्वोत्तम क्रिकेटपटू म्हणून गौरवण्यात आलेल्या सॅमसनने सांगितले, जेव्हा मी विश्वचषकात खेळण्यासाठी घर सोडले, तेव्हा माझा आत्मविश्वास फारसा नव्हता, पण नशिबाने वेगळाच डाव साधला. मी चांगली कामगिरी केली आणि माझे उत्तम स्वागत झाले. तो पुढे म्हणाला, जेव्हा मी मैदानावर उतरतो, तेव्हा मी हजारो लोकांची स्वप्ने माझ्यासोबत घेऊन जातो. त्यांना माझी चांगली कामगिरी बघायची आहे, जेणेकरून त्यांना कळेल की एका छोट्या शहरातील मुलगा क्रिकेटच्या सर्वात मोठ्या मंचावर खेळू शकतो.

---------------

हिंदुस्थान समाचार / वृषाली देशपांडे