मुंबई , 20 मार्च (हिं.स.)।इंडियन प्रीमियर लीग २०२६पूर्वी चेन्नई सुपर किंग्सने संजू सॅमसनला राजस्थान रॉयल्सकडून ट्रेड करून आपल्या संघात सामील केले होते. त्यानंतरपासूनच चाहत्यांना संजूला पिवळ्या जर्सीत पाहण्याची उत्सुकता लागली आहे. चेन्नई सुपर किंग्सने अलीकडेच एमएस धोनी आणि संजू सॅमसन यांच्या पहिल्या भेटीचा एक व्हिडिओ शेअर केला आहे. या क्लिपमध्ये सॅमसन धोनींसोबत संवाद साधताना दिसत आहे.

व्हिडिओच्या पार्श्वभूमीत संजू सॅमसनचा आवाज ऐकू येतो. तो धोनींबद्दल म्हणतो, “आपण आयपीएलमध्ये भेटायचो तेव्हा स्टेडियमसमोर प्रचंड गर्दी असायची. इथे ५-१० लोक असायचे, तिथेही ५-१० लोक असायचे. मला वाटायचं की हे पुरेसं नाही. मला त्यांना एकट्याने भेटायचं होतं. अशीच माझी इच्छा होती. नशिबाने मला त्यांच्या सोबत एकाच ड्रेसिंग रूममध्ये खेळण्याची संधी दिली आहे. त्या काही महिन्यांप्रमाणेच मी खूप उत्साहित आहे. त्यांना भेटण्यासाठी आणि त्यांच्याशी संवाद साधण्यासाठी मी खरोखरच आतुर आहे. त्यांच्यासोबत बसणे, नाश्ता करणे, सराव करणे आणि सामने खेळणे — याचा विचार करूनच मला खूप आनंद होतो.”

संजू सॅमसन तब्बल दशकभर राजस्थान रॉयल्सचा चेहरा राहिला आहे. आता तो आयपीएल २०२६पूर्वी चेन्नई सुपर किंग्समध्ये दाखल झाला आहे. टी२० विश्वचषक २०२६मध्ये शानदार कामगिरी केल्यानंतर तो आयपीएलमध्ये खेळण्यासाठी सज्ज झाला आहे. भारताच्या विजेतेपदात संजूची महत्त्वाची भूमिका होती. सुपर-८ फेरीतील शेवटच्या सामन्यात त्याने वेस्ट इंडिजविरुद्ध नाबाद ९७ धावांची खेळी केली. त्यानंतर उपांत्य आणि अंतिम सामन्यातही त्याने सामना जिंकून देणाऱ्या खेळी साकारल्या. याच कामगिरीमुळे त्याला ‘प्लेअर ऑफ द मॅच’ पुरस्कार मिळाला.

विश्वचषकातील ५ डावांत संजूने ३२१ धावा केल्या आणि विराट कोहलीचा विक्रम मोडला. कोहलीने २०१४ च्या विश्वचषकात ३१९ धावा केल्या होत्या. इतकेच नव्हे तर एका विश्वचषक स्पर्धेत सर्वाधिक षटकार मारण्याचा नवा विक्रमही संजूने प्रस्थापित केला. या स्पर्धेदरम्यान या यष्टिरक्षक फलंदाजाने एकूण २४ षटकार ठोकले.

---------------

हिंदुस्थान समाचार / Priyanka Bansode