- अकोल्यात संगीतमय श्रीरामकथेचा भक्तिमय समारोप

अकोला, 23 मार्च (हिं.स.) :जीवनातील प्रत्येक संघर्ष हा राम-रावण युद्धासारखाच असून त्यात विजय मिळवण्यासाठी दृढनिश्चय, विवेक आणि समर्पण आवश्यक आहे. “रामत्व” जागृत केल्याशिवाय जीवनातील संकटांवर मात करता येत नाही, असे प्रभावी प्रतिपादन रामकथाकार डॉ. भूषण फडके यांनी केले.

जठारपेठ येथील बिर्ला मंदिरात निलेश देव मित्र मंडळातर्फे आयोजित संगीतमय श्रीरामकथेचा पाचवा व अंतिम दिवस उत्साहात पार पडला. “श्रीराम”च्या घोषात परिसर दुमदुमला आणि भाविक भक्तिरसात तल्लीन झाले.

रामकथेतून जीवनमूल्यांचा संदेश

या अंतिम दिवशी रामायणातील युद्धकांड आणि उत्तरकांडातील प्रसंगांचे प्रभावी निरूपण करण्यात आले. रावणवध, सीतेचे अग्निदिव्य, अयोध्येत श्रीरामांचे पुनरागमन आणि रामराज्य स्थापना या प्रसंगांतून “सत्याचा विजय आणि अहंकाराचा अंत” हा संदेश अधोरेखित करण्यात आला.“रामराज्य म्हणजे केवळ शासनव्यवस्था नसून प्रत्येकाच्या मनातील संतुलन, कर्तव्य आणि नैतिकतेचा उत्सव आहे,” असेही डॉ. फडके यांनी सांगितले.

इतिहासाशी जोडलेली प्रेरणा

प्रभू श्रीराम यांच्या आदर्शावर आधारित रामराज्याची संकल्पना पुढे छत्रपती शिवाजी महाराज यांनी ‘हिंदवी स्वराज्य’ रूपात उभी केली, तर संभाजी महाराज यांनी धर्मरक्षणासाठी बलिदान दिले, असे सांगत त्यांनी श्रोत्यांना प्रेरित केले.

“रावण हा अहंकार, लोभ आणि अन्यायाचे प्रतीक आहे; तर राम सत्य, संयम आणि कर्तव्याचे प्रतीक आहेत. प्रत्येकाच्या मनात चालणाऱ्या या संघर्षात रामाला जिंकवणे म्हणजेच खरे जीवन जिंकणे,” असे त्यांनी स्पष्ट केले.

भक्तीगीतांनी भारले वातावरण

कार्यक्रमात वैशाली फडके, देवाशीष फडके आणि निखिल देशमुख यांनी सादर केलेल्या भक्तीगीतांनी वातावरण भक्तिमय केले. तबल्यावर हार्दिक दुबे, झांजवर सुमंत तराळकर आणि मृदंगावर विघ्नेश बोकसे यांनी उत्कृष्ट साथ दिली.

समारोप आणि सत्कार

पाच दिवसीय श्रीरामकथेचा समारोप नगरसेवक निलेश देव यांच्या हस्ते करण्यात आला. यावेळी डॉ. भूषण फडके आणि सर्व कलाकारांचा सत्कार करण्यात आला. कार्यक्रमास जयंतराव सरदेशपांडे, राजेंद्र गुन्नलवार, दिलीपराव देशपांडे, अजय शास्ती, गणेशराव मैराळ, प्रकाश जोशी, शैलेश देव, विजय वाघ, मनीष अभ्यंकर, आशु यादव, निलेश दुधलम, नरेंद्र परदेशी, कैलास तिरपुडे, रामभाऊ उमरेकर यांच्यासह अनेक मान्यवर उपस्थित होते.

आध्यात्मिक संदेश

“प्रभू श्रीराम ही केवळ व्यक्ती नसून एक जीवनमूल्य आहे. कर्तव्य हे भावना पेक्षा मोठे असते आणि त्यागाशिवाय आदर्श निर्माण होत नाही,” असा संदेश देत पाच दिवसीय हा आध्यात्मिक सोहळा भाविकांच्या मनात “रामत्व” जागवून गेला.

-------------------

हिंदुस्थान समाचार / जयेश गावंडे