नवी दिल्ली, 23 मार्च (हिं.स.)प्रसिद्ध अभिनेता विजयच्या तमिळगा वेत्री कळघम (टीव्हीके) पक्षाने पुदुचेरी विधानसभा निवडणूक स्वबळावर लढवण्याचा निर्णय जाहीर केला आहे. पक्षाने राज्यातील सर्व ३० विधानसभा जागांसाठी आपले उमेदवार जाहीर केले आहेत. पक्षाने जाहीर केले की, ते सर्व ३० विधानसभा जागांवर एकट्याने निवडणूक लढवतील.
टीव्हीकेने जाहीर केलेल्या यादीत दोन महिला उमेदवारांचाही समावेश आहे. पुदुचेरी विभागातील मंगलम आणि कदिरकामम जागांसाठी त्यांना उमेदवारी देण्यात आली आहे. पक्षाने तिरुभुवनई (राखीव) जागेसाठी ए. के. साई जे. सरवणन कुमार यांना उमेदवारी दिली आहे. ओसुडू (राखीव) जागेवरून पुन्हा निवडणूक लढवण्यासाठी तिकीट नाकारल्यानंतर सरवणन कुमार यांनी शनिवारी भाजपमधून राजीनामा दिला.
एआयएडीएमकेचे माजी आमदार के. ए. यू. आसना आणि एल. पेरियासामी यांना अनुक्रमे कराईकल (दक्षिण) आणि नेट्टापक्कम (राखीव) जागांवरून उमेदवारी देण्यात आली आहे. पुदुचेरी भाजपचे माजी प्रदेशाध्यक्ष व्ही. समिनाथन यांना लॉस्पेट विधानसभा मतदारसंघातून उमेदवारी देण्यात आली आहे. याशिवाय, पुदुचेरीचे माजी पोलीस उपमहानिरीक्षक व्ही. जे. चंद्रन आणि काँग्रेसचे माजी आमदार एन. धनवेलू हे टीव्हीके पक्षाच्या उमेदवारांमध्ये आहेत. पक्षाने इतर सर्व विधानसभा मतदारसंघांसाठीही आपल्या उमेदवारांची घोषणा केली आहे.
भाजपने पुदुचेरी निवडणुकीतील नऊ जागांसाठीही आपल्या उमेदवारांची घोषणा केली आहे. पुदुचेरी विधानसभेचा कार्यकाळ १५ जून रोजी संपत आहे. पुदुचेरीच्या सर्व जागांसाठी ९ एप्रिल रोजी एकाच टप्प्यात मतदान होणार असून, निवडणुकीचा निकाल ४ मे २०२६ रोजी जाहीर केला जाणार आहे.
---------------
हिंदुस्थान समाचार / वृषाली देशपांडे
