पुणे, 25 मार्च, (हिं.स.)। शहरात होणारी अमली पदार्थांची तस्करी आणि विक्री रोखण्यासाठी पुणे पोलिसांनी विशेष मोहीम हाती घेतली आहे. अमली पदार्थांची तस्करी अणि विक्री रोखण्यासाठी पोलिसांकडून आता ॲपचा (उपयोजन) वापर करण्यात येणार असून, या ॲपवर माहिती देणाऱ्या नागरिकांचे नाव गोपनीय ठेवण्यात येणार आहे. कारवाई करणाऱ्या पोलीस पथकातील अधिकारी आणि कर्मचाऱ्यांना तक्रारदाराचे नाव समजणार नाही, याची काळजी घेण्यात आली आहे, अशी माहिती वरिष्ठ पोलीस अधिकाऱ्यांनी दिली.

शहरातील अमली पदार्थांची तस्करी आणि विक्रीवरील कारवाई आणखी तीव्र करण्यात येणार आहे. या कारवाईत नागरिकांकडून देण्यात येणाऱ्या माहितीचा वापर करण्यात येणार आहे. त्यासाठी खास ॲप तयार करण्यात येणार आहे. शहरातील वस्ती भाग, तसेच उच्चभ्रू भागात छुप्या पद्धतीने अमली पदार्थांची विक्री होते. नागरिकांनी ज्या भागात अमली पदार्थांची विक्री होते. त्या भागाचे छायाचित्र, प्रत्यक्ष ठिकाण (लोकेशन), चित्रफीत या ॲपवर पाठवावी. ही माहिती पाठविल्यास पोलीस आयुक्तालयातील विशेष अधिकाऱ्यांपर्यंत ही माहिती पोहोचणार आहे.

---------------

हिंदुस्थान समाचार / भूषण राजगुरु