वॉशिंग्टन , 25 मार्च (हिं.स.)।न्यूयॉर्कमध्ये असलेल्या इराणी मिशनने बुधवारी एक मोठे विधान केले आहे. मिशनने सांगितले की, होर्मुज सामुद्रधुनीतून गैर-शत्रू देशांच्या जहाजांना जाण्याची परवानगी दिली जाईल. सोशल मीडिया प्लॅटफॉर्म ‘एक्स’वर दिलेल्या माहितीनुसार, जे जहाज इराणविरुद्ध कोणत्याही प्रकारच्या लष्करी कारवाईत सहभागी नाहीत, ती या मार्गाचा वापर करू शकतात.

यासाठी इराणने काही अटीही घातल्या आहेत. जहाजांनी इराणी अधिकाऱ्यांशी समन्वय साधणे आवश्यक असेल आणि सर्व सुरक्षा नियमांचे पूर्णपणे पालन करावे लागेल. इराणच्या संरक्षण परिषदेने स्पष्ट केले आहे की, या रणनीतिक मार्गातून प्रवास करण्यापूर्वी इराणी अधिकाऱ्यांशी समन्वय करणे आता अनिवार्य असेल. अहवालानुसार, अमेरिका आणि इस्रायलच्या लष्करी हालचाली लक्षात घेऊन इराणने हा निर्णय घेतला आहे. तसेच, इराणने कठोर इशारा देत म्हटले आहे की, त्यांच्या वीज प्रकल्पांवर किंवा ऊर्जा केंद्रांवर कोणताही हल्ला झाल्यास इराणी सैन्य तात्काळ निर्णायक आणि विध्वंसक प्रत्युत्तर देईल.

दरम्यान, अमेरिकेचे राष्ट्राध्यक्ष डोनाल्ड ट्रम्प यांनी एक मोठा दावा केला आहे. त्यांनी म्हटले की, अमेरिकेने युद्ध जिंकले आहे. ट्रम्प यांच्या मते, इराणची नौदल आणि वायुसेना पूर्णपणे नष्ट झाली आहे. होमलँड सिक्युरिटी सचिवांच्या शपथविधी समारंभात बोलताना त्यांनी सांगितले की, इराण आता समझोता करण्यास इच्छुक आहे. ट्रम्प यांच्या म्हणण्यानुसार, इराणची संप्रेषण व्यवस्था आणि जवळपास सर्व पायाभूत सुविधा उद्ध्वस्त झाल्या आहेत. त्यांनी असेही म्हटले की, इराणची परिस्थिती इतकी बिकट झाली आहे की अशा अवस्थेत कोणताही देश समझोता करण्याचा विचार करेल.

------------------

---------------

हिंदुस्थान समाचार / Priyanka Bansode