काठमांडू , 27 मार्च (हिं.स.)।भारताचा शेजारी देश नेपाळमध्ये आजपासून नव्या युगाची सुरुवात झाली आहे. राष्ट्रीय स्वतंत्र पार्टीचे नेते बालेन्द्र शाह यांची आज नेपाळचे नवे पंतप्रधान म्हणून नियुक्ती करण्यात आली. त्यानंतर बालेन्द्र शाह यांनी पंतप्रधानपदाची शपथ घेतली. ते नेपाळचे ४७वे पंतप्रधान ठरले आहेत. नेपाळी माध्यमांच्या वृत्तानुसार, राष्ट्रपती रामचंद्र पौडेल यांनी बालेन्द्र शाह यांची पंतप्रधानपदी नियुक्ती केली.

राष्ट्रपती कार्यालयाने जारी केलेल्या निवेदनात म्हटले आहे की, राष्ट्रपती रामचंद्र पौडेल यांनी शुक्रवारी काठमांडू महानगरपालिकेचे माजी महापौर बालेन्द्र शाह यांची संविधानाच्या कलम ७६(१) अंतर्गत पंतप्रधानपदी नियुक्ती केली. गुरुवारी आरएसपीने शाह यांची संसदीय पक्षनेते म्हणून निवड केली होती, त्यामुळे त्यांच्या ४७वे पंतप्रधान होण्याचा मार्ग मोकळा झाला. अलीकडील संसदीय निवडणुकांमध्ये आरएसपीला जवळपास दोन-तृतीयांश बहुमतासह मोठा विजय मिळाला होता.

बालेन्द्र शाह यांनी शुक्रवारी दुपारी १२:३४ वाजता राष्ट्रपती भवनात आयोजित भव्य समारंभात पंतप्रधानपदाची शपथ घेतली. पद आणि गोपनीयतेची शपथ हिंदू परंपरेनुसार पार पडली. या प्रसंगी सात शंखवादकांनी शंखनाद करून मंगलमय सुरुवात केली. परंपरेनुसार, कोणत्याही शुभ कार्याच्या प्रारंभी शंखनादाला यश आणि सकारात्मकतेचे प्रतीक मानले जाते.

शाह यांनी पूर्व नेपाळातील झापा-५ मतदारसंघात माजी पंतप्रधान के. पी. शर्मा ओली यांचा ४९,६१४ मतांच्या मोठ्या फरकाने पराभव केला. शाह यांना ६८,३४८ मते मिळाली, तर ओली यांना १८,७३४ मते मिळाली. १९९१ नंतरच्या नेपाळच्या संसदीय निवडणुकांमध्ये कोणत्याही उमेदवाराला मिळालेल्या मतांपैकी हे सर्वाधिक मत असल्याचे मानले जाते.

बालेन्द्र शाह यांनी २०२२ मध्ये राजकारणात प्रवेश केला, जेव्हा त्यांनी काठमांडूच्या महापौरपदाची निवडणूक अपक्ष उमेदवार म्हणून लढवून विजय मिळवला. २७ एप्रिल १९९० रोजी काठमांडू येथे मधेसी कुटुंबात त्यांचा जन्म झाला. भारतातील विश्वेश्वरैया टेक्नोलॉजिकल युनिव्हर्सिटीमधून स्ट्रक्चरल इंजिनिअरिंगमध्ये मास्टर्स पदवी घेण्यापूर्वी त्यांनी काठमांडूमध्ये पदवी शिक्षण पूर्ण केले. अभियांत्रिकी पार्श्वभूमीमुळे त्यांना पायाभूत सुविधा, शहरी विकास आणि सार्वजनिक कामकाजाची व्यावहारिक समज मिळाली. ही तांत्रिक कौशल्ये काठमांडू महानगरपालिकेचे महापौर म्हणून त्यांच्या कार्यशैलीत आणि प्रशासनात महत्त्वाची ठरली.

---------------

हिंदुस्थान समाचार / Priyanka Bansode