रियाध , 27 मार्च (हिं.स.)।युक्रेनचे राष्ट्राध्यक्ष वोलोदिमीर झेलेन्स्की अचानक सौदी अरेबियाला पोहोचले आहेत. त्यांनी सोशल मीडियावर माहिती दिली की येथे त्यांच्या अनेक महत्त्वाच्या बैठकांचे आयोजन करण्यात आले आहे. या दौऱ्याबाबतची संपूर्ण माहिती अद्याप समोर आलेली नसली, तरी पश्चिम आशियातील वाढता तणाव आणि सुरक्षा सहकार्याच्या पार्श्वभूमीवर या भेटीकडे पाहिले जात आहे.

झेलेन्स्की यांनी अलीकडेच सांगितले होते की, युक्रेन पश्चिम आशिया आणि खाडीतील पाच देश — सौदी अरेबिया, यूएई, कतार, कुवेत आणि जॉर्डन — यांना मदत करत आहे. ड्रोन हल्ल्यांपासून संरक्षणासाठी तंत्रज्ञान आणि प्रणाली विकसित करण्यास युक्रेन या देशांना सहाय्य करत आहे. रशियासोबतच्या युद्धादरम्यान युक्रेनने कमी खर्चात आणि प्रभावी असे ड्रोन इंटरसेप्टर विकसित केले असून त्यांना जगभरात मोठी मागणी आहे.

या सहकार्याच्या बदल्यात युक्रेन खाडी देशांकडून अत्याधुनिक एअर डिफेन्स क्षेपणास्त्रांची मागणी करत आहे. रशियाकडून सुरू असलेल्या सततच्या हल्ल्यांना रोखण्यासाठी या क्षेपणास्त्रांची युक्रेनला अत्यंत गरज आहे. होर्मुज सामुद्रधुनीत सुरक्षा प्रस्थापित करण्यासाठी आपण काही भूमिका बजावू शकतो का, याचाही युक्रेन विचार करत आहे. जागतिक तेलपुरवठ्यासाठी हा प्रदेश अत्यंत महत्त्वाचा असून येथे निर्माण होणाऱ्या कोणत्याही तणावाचा परिणाम संपूर्ण जगावर होतो.

दरम्यान, युरोपमधील अनेक देशांनी रशियाच्या ‘शॅडो फ्लीट’विरुद्ध कठोर कारवाई करण्याचा निर्णय घेतला आहे. हे जुने तेलवाहू टँकर असून त्यांचा वापर करून रशिया निर्बंधांना चकवा देत तेल विकतो आणि त्या पैशातून युद्ध चालवतो. ब्रिटनचे पंतप्रधान कीअर स्टार्मर यांनी सांगितले की, आता या जहाजांवर अधिक कडक कारवाई केली जाईल आणि गरज पडल्यास त्यांची तपासणी किंवा अडवण्याची कारवाईही केली जाईल.

तुर्किये जवळ ‘अल्तुरा’ नावाच्या तेलवाहू जहाजावर समुद्री ड्रोनद्वारे हल्ला करण्यात आला. जहाजावर 27 क्रू सदस्य होते, मात्र सर्वजण सुरक्षित आहेत. हे जहाज रशियन तेल वाहून नेत होते आणि युरोपियन युनियनच्या निर्बंधांच्या यादीत आधीपासूनच समाविष्ट होते. या हल्ल्यामागे नेमके कोण आहे हे अद्याप स्पष्ट झालेले नाही, मात्र यापूर्वी अशा प्रकारचे हल्ले युक्रेनकडून करण्यात आल्याचे दिसून आले आहे.

---------------

हिंदुस्थान समाचार / Priyanka Bansode