गुवाहाटी, 31 मार्च (हिं.स.)वैभव सूर्यवंशी (५२) आणि यशस्वी जैस्वाल (३८*) यांच्या वादळी खेळीच्या जोरावर राजस्थान रॉयल्सने १२.१ षटकांत १२८ धावांचे लक्ष्य पूर्ण केले. यासह राजस्थानने चेन्नई सुपर किंग्सवर (CSK) आठ गडी राखून दणदणीत विजय नोंदवला. गुवाहाटी येथील बरसापारा क्रिकेट स्टेडियमवर खेळल्या गेलेल्या या सामन्यात चेन्नईने १९.४ षटकांत १० गडी गमावून १२७ धावा केल्या. प्रत्युत्तरात, राजस्थानने १२.१ षटकांत २ गडी गमावून १२८ धावा केल्या आणि सामना जिंकला.

राजस्थानने नाणेफेक जिंकून चेन्नईला फलंदाजीसाठी आमंत्रित केले. राजस्थानच्या गोलंदाजांनी पावसामुळे खेळपट्टीवर असलेल्या ओलाव्याचा पुरेपूर फायदा घेतला आणि सीएसकेच्या फलंदाजांची धुलाई केली. वेगवान गोलंदाज असोत वा फिरकी गोलंदाज चेन्नईच्या फलंदाजांना राजस्थानच्या प्रत्येक गोलंदाजाचा सामना करणे कठीण जात होते. संजू सॅमसन आणि ऋतुराज गायकवाड सीएसकेला चांगली सुरुवात करून देऊ शकले नाहीत. दोघेही प्रत्येकी ६ धावांवर बाद झाले. तिसऱ्या क्रमांकावर फलंदाजी करणाऱ्या आयुष म्हात्रेला आपले खातेही उघडता आले नाही. मॅथ्यू शॉर्टही २ धावांवर बाद झाला. संघाच्या पहिल्या चार फलंदाजांपैकी कोणीही दुहेरी आकडा गाठू शकला नाही. संघ नियमित अंतराने विकेट गमावत राहिला आणि १९.४ षटकांत १२७ धावांवर त्यांचा डावा आटोपला.

आठव्या क्रमांकावर फलंदाजी करणाऱ्या जेमी ओव्हरटनने संघासाठी एकट्याने झुंज दिली. ओव्हरटनने २ चौकार आणि २ षटकारांसह ३६ चेंडूंमध्ये ४३ धावा करून संघाच्या धावसंख्येत महत्त्वपूर्ण योगदान दिले. शेवटच्या षटकाच्या चौथ्या चेंडूवर धावबाद होण्यापूर्वी, ओव्हरटनने अंशुल कंबोजसोबत (७ नाबाद) दहाव्या विकेटसाठी ३३ धावांची भागीदारी केली. याव्यतिरिक्त, सरफराज खानने १७ आणि कार्तिक शर्माने १८ धावा केल्या. २०१२ ते २०१५ आणि २०१८ ते २०२५ पर्यंत सीएसके संघाचा भाग असलेल्या अनुभवी अष्टपैलू रवींद्र जडेजाने राजस्थान रॉयल्ससाठी आपल्या पहिल्याच सामन्यात एकाच षटकात आपल्या माजी संघाला दोन मोठे धक्के दिले. जडेजाने शिवम दुबे आणि सरफराज खानसारख्या शक्तिशाली फलंदाजांना एकाच षटकात बाद केले. राजस्थान रॉयल्सकडून जोफ्रा आर्चरने ४ षटकांत १९ धावांत २ बळी, नंद्रे बर्गरने ४ षटकांत २६ धावांत २ बळी आणि रवींद्र जडेजाने ३ षटकांत १८ धावांत २ बळी घेतले. ब्रिजेश शर्मा, संदीप शर्मा आणि रवी बिश्नोई यांनी प्रत्येकी १ बळी घेतला.

१२८ धावांचे लक्ष्य गाठताना, यशस्वी जैस्वाल आणि वैभव सूर्यवंशी यांनी ६.२ षटकांत पहिल्या विकेटसाठी ७५ धावा जोडून विजयाचा भक्कम पाया रचला. वैभवने १७ चेंडूंमध्ये ४ चौकार आणि ५ षटकारांच्या मदतीने ५२ धावांची खेळी केली. सरफराज खानने अंशुल कंबोजचा अप्रतिम झेल घेऊन वैभवचा डाव संपवला.

यशस्वी जैस्वालने ध्रुव जुरेलसोबत दुसऱ्या विकेटसाठी २४ धावांची भागीदारी केली. जुरेल ९ चेंडूंमध्ये १८ धावा करून बाद झाला. जैस्वाल आणि कर्णधार रियान पराग यांनी २९ धावांची नाबाद भागीदारी करून संघाला विजय मिळवून दिला. जैस्वाल ३६ चेंडूंमध्ये ३८ धावा करून नाबाद राहिला. पराग ११ चेंडूंमध्ये १४ धावा करून नाबाद राहिला. अंशुल कंबोजने सीएसकेसाठी दोन्ही विकेट्स घेतल्या.

---------------

हिंदुस्थान समाचार / वृषाली देशपांडे