तेहरान, 07 मार्च (हिं.स.)पश्चिम आशियातील वाढत्या तणावाच्या पार्श्वभूमीवर, इराणचे राष्ट्राध्यक्ष मसूद पेझेश्कियान यांनी अमेरिकेच्या बिनशर्त आत्मसमर्पणाच्या मागण्यांना स्पष्टपणे नाकारले आहे. त्यांनी म्हटले आहे की, अशी अपेक्षा करणे हे एक स्वप्न आहे जे कधीही पूर्ण होणार नाही. सरकारी टीव्हीवर प्रसारित झालेल्या रेकॉर्ड केलेल्या संदेशात त्यांनी अमेरिकेवर तीव्र हल्ला चढवला आणि म्हटले की इराण कोणत्याही दबावापुढे झुकणार नाही.

आपल्या निवेदनात राष्ट्राध्यक्ष पेझेश्कियान यांनी प्रादेशिक देशांवरील हल्ल्यांबद्दलही खेद व्यक्त केला. त्यांनी म्हटले आहे की, काही आखाती देशांवर अलिकडेच झालेले हल्ले गैरसमजामुळे झाले आहेत आणि जोपर्यंत त्या देशांच्या भूमीवरून इराणवर कोणताही हल्ला होत नाही तोपर्यंत तेहरान भविष्यात अशा घटना रोखण्याचा प्रयत्न करेल. त्यांंनी सांगितले की इराणच्या अंतरिम नेतृत्व परिषदेने या निर्णयाला मान्यता दिली आहे. इराणचे हे विधान अशा वेळी आले आहे. जेव्हा बहरीन, सौदी अरेबिया आणि संयुक्त अरब अमिरातीवरील हल्ल्यांच्या बातम्या समोर आल्या आहेत आणि ज्यामुळे तणाव वाढला आहे.

अमेरिकेचे राष्ट्राध्यक्ष डोनाल्ड ट्रम्प यांनी इराणला शरणागती पत्करण्याचे आवाहन केले. ट्रुथ सोशलवरील एका पोस्टमध्ये ट्रम्प म्हणाले, इराण पूर्णपणे शरणागती पत्करत नाही तोपर्यंत राजनैतिक संधी नाही. ट्रम्प म्हणाले की, ते बिनशर्त शरणागती पत्करल्याशिवाय इराणशी वाटाघाटी करणार नाहीत. अमेरिकन अधिकाऱ्यांनी इराणला येणाऱ्या बॉम्बस्फोट मोहिमेचा इशाराही दिला आहे. अधिकाऱ्यांचे म्हणणे आहे की, पुढील हल्ला आठवडाभर चाललेल्या संघर्षातील सर्वात तीव्र असेल. अमेरिकेने इस्रायलला १५१ दशलक्ष डॉलर्स किमतीची नवीन शस्त्रे विकण्यासही मान्यता दिली आहे. अमेरिका आणि इस्रायलने इराणवर हल्ले केले आहेत, ज्यामध्ये इराणच्या लष्करी क्षमता, नेतृत्व आणि अणुकार्यक्रमाला लक्ष्य केले आहे.

इराणच्या संयुक्त राष्ट्रांच्या राजदूताने अमेरिकेला प्रत्युत्तर देत म्हटले आहे की, देश स्वतःचे रक्षण करण्यासाठी आवश्यक ती सर्व पावले उचलेल. शनिवारी सकाळी इस्रायलची राजधानी जेरुसलेममध्येही मोठ्या स्फोटांचे आवाज ऐकू आले. इराणकडून क्षेपणास्त्रांच्या हल्ल्यामुळे लोक इस्रायलमधील बॉम्ब आश्रयस्थानांकडे पळून जात आहेत. इस्रायली आपत्कालीन सेवांनी हल्ल्यांमुळे कोणत्याही जीवितहानी झाल्याचे वृत्त दिलेले नाही.

---------------

हिंदुस्थान समाचार / वृषाली देशपांडे