ब्यूनस आयर्स, 01 एप्रिल, (हिं.स.) अर्जेंटिनाच्या भूमीवर आपल्या सहकाऱ्यांसोबत शेवटच्या वेळी मैदानात उतरताना भावूक झालेल्या लिओनेल मेस्सीला आपले अश्रू आवरणे कठीण झाले. मेस्सीच्या अर्जेंटिनाने ब्युनोस आयर्समधील ला बोम्बोनेरा येथे झांबियाविरुद्ध एक मैत्रीपूर्ण सामना खेळला. या सामन्यात बार्सिलोनाच्या या माजी स्टारने एक गोल केला आणि दुसऱ्या गोलसाठी सहाय्य केले. अर्जेंटिनाने झांबियाचा ५-० असा धुव्वा उडवला आणि त्यानंतर आपल्या विश्वचषक विजेतेपदाच्या बचावाला सुरुवात केली. गेल्या शुक्रवारी मॉरिटानियाविरुद्धच्या अर्जेंटिनाच्या विजयानंतर प्रशिक्षक लिओनेल स्कालोनी यांनी मेस्सीला पुन्हा सुरुवातीच्या संघात स्थान दिले होते आणि त्याने ला बोम्बोनेरा येथील मैत्रीपूर्ण सामन्यात त्वरित प्रभाव पाडला.
सामना सुरू होण्यापूर्वी आपल्या सहकाऱ्यांसोबत उभे असताना, ३८ वर्षीय इंटर मियामीचा हा स्टार खेळाडू लिओनेल मेस्सी भावूक झालेला दिसत होता. घरच्या प्रेक्षकांकडून मिळणारे जयघोष, गाणी आणि प्रेम तो अनुभवत होता. स्टेडियममधील एका व्हायरल व्हिडिओमध्ये, आपल्या घरच्या चाहत्यांसमोरच्या संभाव्य निरोपाच्या सामन्यादरम्यान मेस्सी भावूक होऊन अश्रू पुसताना दिसत होता.
अनुभवी फॉरवर्डने चौथ्या मिनिटाला ज्युलियन अल्वारेझला सलामीच्या गोलसाठी संधी निर्माण करून दिली आणि त्यानंतर ब्युनोस आयर्समध्ये ४३ व्या मिनिटाला स्वतः गोल करून खचाखच भरलेल्या प्रेक्षकांना आनंदित केले. मेस्सी आणि अल्वारेझ व्यतिरिक्त, व्हॅलेंटिन बार्को आणि निकोलस ओटामेंडी यांनीही अर्जेंटिनासाठी गोल केले. जेव्हा चाहत्यांनी उभे राहून मेस्सीला टाळ्यांचा कडकडाट करत मानवंदना दिली, तेव्हा हा भावनिक प्रसंग आणखी खास बनला. समर्थकांनी आपल्या कर्णधाराला अर्जेंटिनाला आणखी एक विश्वचषक जिंकून देण्याचे आवाहन करत स्टेडियमभर घोषणा घुमत होत्या.
२०२६ च्या विश्वचषकापूर्वी अर्जेंटिनाचा हा शेवटचा घरच्या मैदानावरचा सामना होता. संघ १६ जून रोजी अल्जेरियाविरुद्ध आपल्या मोहिमेला सुरुवात करेल, त्यानंतर ऑस्ट्रिया आणि जॉर्डनविरुद्ध सामने होतील. मेस्सी पुन्हा एकदा संघातील एक महत्त्वाचा फुटबॉलपटू असेल आणि या भावनिक क्षणाने त्याच्या शानदार कारकिर्दीत एक अविस्मरणीय अध्याय जोडला आहे.
---------------
हिंदुस्थान समाचार / वृषाली देशपांडे
