वॉशिंग्टन, 10 एप्रिल (हिं.स.)।नासा ने मानवी अंतराळ उड्डाणाच्या क्षेत्रात एक मोठी कामगिरी जाहीर केली आहे. शुक्रवारी नासाने सांगितले की त्यांचे आर्टेमिस-II मिशन १ एप्रिल रोजी यशस्वीरित्या प्रक्षेपित झाले होते आणि आता आपल्या ऐतिहासिक प्रवासाच्या अंतिम टप्प्यात पोहोचले असून अंतराळवीर शनिवारी पृथ्वीवर पोहचण्याची शक्यता आहे.

नासाने सोशल मीडिया प्लॅटफॉर्म एक्सवर माहिती देताना सांगितले की, अंतराळयान चंद्राभोवती परिक्रमा करून आता पृथ्वीवर परतत आहे. त्याचे समुद्रात लँडिंग (स्प्लॅशडाउन) १० एप्रिल रोजी रात्री सुमारे ८:०७ वाजता (ईटी) प्रशांत महासागरात होण्याची अपेक्षा आहे. नासाने आपल्या संदेशात म्हटले आहे की, ते अंतराळवीरांचे पुन्हा पृथ्वीवर स्वागत करण्यासाठी उत्सुक आहेत.

ही मोहीम जगभरात चर्चेचा विषय ठरली आहे, कारण पाच दशकांहून अधिक काळानंतर पृथ्वीच्या खालच्या कक्षेबाहेर, गहन अंतराळाच्या शोधात मानवतेची ही पुनरागमनाची खूण आहे. नासाच्या मते, या मोहिमेत अंतराळवीरांनी आतापर्यंतची सर्वात मोठी अंतराची यात्रा केली असून, भविष्यातील चंद्र मोहिमांसाठी यामुळे मार्ग मोकळा होणार आहे.

या मोहिमेदरम्यान चार सदस्यांच्या पथकाने पृथ्वीपासून २,४८,६५५ मैल अंतर पार करून नवा विक्रम प्रस्थापित केला. या पथकात रीड वाइजमन, विक्टर ग्लोवर, क्रिस्टिना कोच आणि जेरेमी हॅनसेन यांचा समावेश होता. त्यांच्या प्रवासातील सर्वाधिक दूरच्या टप्प्यावर ते सुमारे २,५२,७५६ मैलांपर्यंत पोहोचले, ज्यामुळे अपोलो-१३ मिशन चा आधीचा विक्रमही मागे पडला.

अधिकाऱ्यांच्या मते, ही १० दिवसांची मोहीम स्पेस लॉन्च सिस्टम रॉकेट आणि ओरियन अंतराळयान यांच्या गहन अंतराळातील क्षमतेची चाचणी घेण्यासाठी आखण्यात आली होती. यात चंद्राजवळून जाणे हा एक महत्त्वाचा टप्पा होता, जो भविष्यातील मोहिमांसाठी अत्यंत आवश्यक मानला जातो.

नासाच्या अधिकारी डॉ. लॉरी ग्लेझ यांनी सांगितले की, ही यशस्वी मोहीम संस्थेची नवीन मर्यादा ओलांडण्याची आणि अंतराळात नव्या शोधासाठी असलेली बांधिलकी दर्शवते. ओरियन अंतराळयानातून जेरेमी हॅनसेन यांनी म्हटले की, ही कामगिरी पूर्वीच्या अंतराळवीरांच्या वारशाचा सन्मान करते आणि अंतराळ संशोधनाच्या नव्या युगाची सुरुवात दर्शवते.आर्टेमिस-II मिशन हे नासाच्या त्या मोठ्या उद्दिष्टाच्या दिशेने एक महत्त्वाचे पाऊल मानले जात आहे, ज्यामध्ये चंद्रावर दीर्घकाळ मानवाची उपस्थिती निर्माण करणे समाविष्ट आहे.

---------------

हिंदुस्थान समाचार / Priyanka Bansode