नवी दिल्ली , 16 एप्रिल (हिं.स.)। दिल्ली विधानसभा अध्यक्ष विजेंद्र गुप्ता यांना सतत मिळत असलेल्या बॉम्ब धमक्या आणि अलीकडील सुरक्षा त्रुटीच्या पार्श्वभूमीवर त्यांना ‘झेड’ श्रेणीची सुरक्षा प्रदान करण्यात आली आहे. यासोबतच विधानसभा परिसराची सुरक्षा देखील पूर्णपणे कडक करण्यात येत आहे, जेणेकरून कोणतीही गडबड होऊ नये.

दिल्ली विधानसभा अध्यक्षांची सुरक्षा वाढवत त्यांना ‘ झेड’ श्रेणीचे सुरक्षा कवच देण्यात आले आहे. हा निर्णय तेव्हा घेण्यात आला, जेव्हा विधानसभा सचिवालय आणि अध्यक्षांच्या कार्यालयाच्या अधिकृत ईमेल आयडीवर सुमारे ६ ते ७ धमकीचे ईमेल प्राप्त झाले. या ईमेलमध्ये बॉम्बस्फोटाची धमकी देण्यात आली होती. या धमक्यांव्यतिरिक्त अलीकडेच विधानसभा परिसरात एक मोठी सुरक्षा त्रुटीही समोर आली होती. एका व्यक्तीने विधानसभा गेट ओलांडून आत प्रवेश केला आणि अध्यक्षांच्या गाडीत एक संशयास्पद वस्तू ठेवून निघून गेला. या घटनेनंतर सुरक्षा यंत्रणा सतर्क झाली असून संपूर्ण व्यवस्थेचा आढावा घेण्यात आला आहे.

नवीन सुरक्षा व्यवस्थेनुसार आता विजेंद्र गुप्ता यांच्या सोबत २४ तास विशेष सुरक्षा पथक तैनात राहील. त्यांच्या ताफ्यासोबत कायम एक एस्कॉर्ट वाहन असेल. सुरक्षा पथकाची जबाबदारी एका प्रभारी अधिकाऱ्याकडे असेल, तर प्रशिक्षित कमांडोही सोबत असतील. सार्वजनिक कार्यक्रम आणि अधिकृत दौऱ्यांदरम्यानही त्यांची सुरक्षा पूर्वीपेक्षा अधिक कडक राहील.

दरम्यान, दिल्ली विधानसभा परिसरातही मोठ्या प्रमाणावर सुरक्षा उपाययोजना केल्या जात आहेत. सर्व प्रवेशद्वारांवर ऑटोमॅटिक बूम बॅरिअर्स बसवले जात आहेत, जेणेकरून येणाऱ्या-जाणाऱ्या प्रत्येक व्यक्ती आणि वाहनांची तपासणी अनिवार्य होईल. बॅग आणि इतर सामानाचीही काटेकोर तपासणी केली जाईल. याशिवाय, परिसरात सीआरपीएफची क्विक रिस्पॉन्स टीम (QRT) वाहनांसह तैनात करण्यात आली आहे. ही टीम सतत गस्त घालेल आणि कोणत्याही आपत्कालीन परिस्थितीत तात्काळ कारवाई करेल.

विधानसभा सचिवालयाने स्पष्ट केले आहे की लोकशाही संस्थांना लक्ष्य करण्याचा कोणताही प्रयत्न सहन केला जाणार नाही. अध्यक्ष आणि विधानसभा यांची सुरक्षा ही सर्वोच्च प्राधान्याची बाब आहे. नव्या उपाययोजनांमुळे विधानसभा परिसर पूर्णपणे सुरक्षित ठेवण्याचा प्रयत्न केला जात आहे.

---------------

हिंदुस्थान समाचार / Priyanka Bansode