नवी दिल्ली , 05 एप्रिल (हिं.स.)।भारत आणि पाकिस्तान यांच्यात पुन्हा एकदा शाब्दिक संघर्ष तीव्र होताना दिसत असून त्यामुळे प्रादेशिक तणाव वाढण्याची शक्यता व्यक्त केली जात आहे. पाकिस्तानचे संरक्षणमंत्री ख्वाजा आसिफ यांनी भारताला इशारा देत म्हटले की, भविष्यात भारताने कोणत्याही प्रकारची “ धोकादायक कारवाई” केल्यास पाकिस्तान त्याला कोलकात्यासारख्या मोठ्या शहराला लक्ष्य करून प्रत्युत्तर देईल.त्यांनी हे वक्तव्य शनिवारी त्यांच्या गृहनगर सियालकोट येथे पत्रकारांशी संवाद साधताना केले. या वादग्रस्त वक्तव्यामुळे राजकीय आणि लष्करी वर्तुळात खळबळ उडाली आहे.

लाहोरपासून सुमारे 130 किलोमीटर अंतरावर असलेले सियालकोट हे पाकिस्तानमधील महत्त्वाचे लष्करी आणि औद्योगिक केंद्र मानले जाते. याच ठिकाणाहून आसिफ यांनी भारताविरोधात कठोर भूमिका घेत सांगितले की, भारताने पाकिस्तानला जबाबदार धरत कोणतीही लष्करी कारवाई करण्याचा प्रयत्न केला, तर पाकिस्तानही मागे हटणार नाही आणि जोरदार प्रत्युत्तर देईल. त्यांनी पुढे असेही म्हटले की, यावेळी प्रतिक्रिया मर्यादित स्वरूपाची नसेल, तर मोठ्या आणि रणनीतिक लक्ष्यांवर हल्ला केला जाऊ शकतो.

आपल्या वक्तव्यात ख्वाजा आसिफ यांनी आणखी एक गंभीर दावा केला. त्यांनी आरोप केला की भारत “खोटे कथानक” तयार करण्याच्या तयारीत आहे. त्यांच्या मते, भारत स्वतःच्या नागरिकांचा किंवा काही पाकिस्तान्यांचा वापर करून बनावट कारवाई घडवून आणण्याचा प्रयत्न करू शकतो. या कारवाईत काही मृतदेह एखाद्या ठिकाणी ठेवून ते दहशतवादी असल्याचा दावा केला जाऊ शकतो आणि त्यांनी मोठी घटना घडवून आणल्याचे सांगितले जाऊ शकते. मात्र, या आरोपांच्या समर्थनार्थ त्यांनी कोणतेही ठोस पुरावे सादर केले नाहीत, त्यामुळे त्यांच्या दाव्यांच्या विश्वासार्हतेवर प्रश्नचिन्ह निर्माण झाले आहे. यापूर्वीही पाकिस्तानकडून अशा प्रकारचे आरोप अनेकदा करण्यात आले आहेत; मात्र बहुतेक वेळा त्यासाठी ठोस पुरावे समोर आलेले नाहीत. तरीही अशा विधानांमुळे दोन्ही देशांमधील अविश्वास आणखी वाढत असल्याचे मानले जाते.

ख्वाजा आसिफ यांचे हे वक्तव्य प्रत्यक्षात भारताचे संरक्षणमंत्री राजनाथ सिंह यांच्या अलीकडील विधानाला उत्तर म्हणून आले आहे. राजनाथ सिंह यांनी गुरुवारी स्पष्ट शब्दांत म्हटले होते की, सध्याच्या परिस्थितीत पाकिस्तानकडून कोणतेही धोकादायक पाऊल उचलले गेले, तर भारत त्याला “अभूतपूर्व आणि निर्णायक” पद्धतीने प्रत्युत्तर देईल. दोन्ही देशांमधील तणाव आधीपासूनच कायम असताना हे वक्तव्य समोर आले आहे.

---------------

हिंदुस्थान समाचार / Priyanka Bansode