जेरुसलेम, 07 एप्रिल (हिं.स.)।अमेरिका-इस्रायल आणि इराण यांच्यातील संघर्ष दिवसेंदिवस अधिक भयावह होत चालला आहे. अमेरिकेचे राष्ट्राध्यक्ष डोनाल्ड ट्रम्प यांनी इराणला बुधवार सकाळपर्यंत उद्ध्वस्त करण्याची धमकी दिली आहे. दरम्यान, इस्रायलने इराणी नागरिकांना रेल्वेने प्रवास करू नये असा इशारा दिला आहे.

इस्रायली सैन्याने इराणी नागरिकांना सावध करत सांगितले की, रेल्वेमध्ये किंवा रेल्वे मार्गांच्या आसपास त्यांची उपस्थिती त्यांच्या जीवासाठी धोकादायक ठरू शकते. इस्रायली सैन्याने फारसी भाषेत जारी केलेल्या इशाऱ्यात म्हटले आहे, “तुमच्या सुरक्षेसाठी आम्ही विनंती करतो की, आतापासून इराणच्या वेळेनुसार रात्री 9 वाजेपर्यंत देशभरात रेल्वेचा वापर किंवा रेल्वेने प्रवास टाळावा.”

दरम्यान, तेहरान प्रशासनाने अनेक आठवड्यांपासून संपूर्ण इराणमध्ये इंटरनेट सेवा बंद ठेवली आहे, त्यामुळे इशारे आणि माहिती सामान्य नागरिकांपर्यंत पोहोचणे कठीण झाले आहे. मात्र, इराणबाहेरून कार्यरत फारसी भाषेतील सॅटेलाइट नेटवर्कद्वारे अशा बातम्या प्रसारित होत असून त्यातून माहिती इराणमध्ये पोहोचत आहे. मंगळवारी पहाटे इस्रायलने इराणवर हल्ल्यांची नवी मालिका सुरू केली, तर त्याला प्रत्युत्तर म्हणून इराणने इस्रायल आणि त्याच्या खाडीतील अरब शेजारी देशांवर क्षेपणास्त्र हल्ले केले.

इराणने ट्रम्प यांनी सुचवलेला युद्धविराम प्रस्ताव फेटाळून लावल्यानंतर ट्रम्प यांनी 48 तासांत इराणला उद्ध्वस्त करण्याची धमकी दिली होती. त्यांनी इराणमधील वीज प्रकल्प आणि पूल लक्ष्य करण्याचा इशाराही दिला होता. आता ट्रम्प यांनी दिलेली मुदत संपत आली असून, इस्रायली सैन्याच्या ताज्या इशाऱ्यामुळे युद्धाची शक्यता आणखी वाढली आहे.

---------------

हिंदुस्थान समाचार / Priyanka Bansode