वॉशिंग्टन , 07 एप्रिल (हिं.स.)।अमेरिकेचे राष्ट्राध्यक्ष डोनाल्ड ट्रम्प पुन्हा एकदा आपल्या वक्तव्यामुळे वादाच्या भोवऱ्यात सापडले आहेत. यावेळी वाद त्यांच्या त्या सोशल मीडिया पोस्टमुळे निर्माण झाला आहे, ज्यामध्ये त्यांनी इराणबाबत अत्यंत कठोर आणि आक्षेपार्ह भाषा वापरली होती. ट्रम्प यांनी म्हटले होते की, जर इराणने युद्ध समाप्त करण्यासाठी करार केला नाही, तर त्याला प्रचंड विध्वंसाचा सामना करावा लागेल.

या वक्तव्यानंतर पत्रकारांनी त्यांच्यावर होत असलेल्या टीकेबाबत प्रश्न विचारला असता, ट्रम्प यांनी स्पष्ट शब्दांत सांगितले की त्यांना टीकाकारांची अजिबात पर्वा नाही. त्यांनी म्हटले, “मला टीकाकारांची काहीही पर्वा नाही.” काही लोक त्यांच्या मानसिक आरोग्यावर प्रश्न उपस्थित करत असल्याबाबत विचारले असता त्यांनी तेही दुर्लक्षित करत म्हटले की, जर असे असेल तर देशाला त्यांच्या सारख्या आणखी लोकांची गरज आहे.

ट्रम्प यांनी आपल्या बचावात सांगितले की, ते राष्ट्राध्यक्ष होण्यापूर्वी अमेरिकेला व्यापारासह अनेक क्षेत्रांत नुकसान सहन करावे लागत होते, मात्र त्यांनी सत्तेत आल्यानंतर परिस्थिती बदलली. त्यांच्या मते, त्यांची कठोर धोरणे आणि आक्रमक वक्तव्ये ही अमेरिकेच्या हितासाठीच आहेत. मात्र, त्यांच्या या विधानानंतर विरोधक आणि अनेक टीकाकारांनी तीव्र प्रतिक्रिया दिली. विशेषतः ईस्टरच्या दिवशी केलेल्या त्यांच्या सोशल मीडिया पोस्टला अनेकांनी घृणास्पद आणि अशोभनीय म्हटले. काही नेत्यांनी तर त्यांच्या मंत्रिमंडळाने अमेरिकेच्या संविधानातील २५व्या दुरुस्तीचा वापर करून त्यांना पदावरून हटवण्याचा विचार करावा, अशी मागणीही केली.

या वाढत्या तणावाच्या पार्श्वभूमीवर राष्ट्राध्यक्ष डोनाल्ड ट्रम्प यांनी म्हटले की, निर्णय त्यांच्या हातात असता तर अमेरिका इराणच्या तेलावर ताबा मिळवू शकली असती, कारण ते स्वतःला प्रथम एक व्यावसायिक (बिझनेसमन) मानतात. व्हाइट हाऊसमधील पत्रकार परिषदेत त्यांनी सांगितले की, अमेरिका यापूर्वी व्हेनेझुएलासोबत तेलासंदर्भात भागीदारी केली आहे, त्यामुळे इराणच्या बाबतीतही तसे करता येऊ शकते.त्यांनी असेही म्हटले की, “युद्ध जिंकणाऱ्याला त्याचा फायदा मिळायलाच हवा” आणि अमेरिकेनेही त्याचा उपयोग केला पाहिजे. यावरून अमेरिकेची युद्धानंतर संसाधनांवर ताबा मिळवण्याची भूमिका बदलू शकते, असा स्पष्ट संकेत त्यांनी दिला. ट्रम्प यांनी पुढे सांगितले की, दुसऱ्या महायुद्धानंतर अमेरिकेने इतर देशांना मदत केली, पण आता तसे करणे आवश्यक नाही.

या दरम्यान ट्रम्प यांनी पुन्हा एकदा इराणला इशारा देत सांगितले की, करार करण्यासाठी मंगळवार रात्री ८ वाजेपर्यंत (भारतीय वेळेनुसार बुधवार सकाळी ५:३० वाजेपर्यंत) मुदत आहे. त्यांनी इशारा दिला की, या वेळेत करार झाला नाही तर इराणमध्ये “ना पूल उरतील, ना वीज प्रकल्प” आणि देश पाषाणयुगात पोहोचेल.ट्रम्प यांच्या म्हणण्यानुसार, इराणने सुरुवातीला सात दिवसांची मुदत मागितली होती, पण अमेरिकेने त्यांना दहा दिवस दिले. आता ही अंतिम मुदत असून निर्णय इराणनेच घ्यायचा आहे. त्यांनी या कालावधीला अत्यंत “महत्त्वाचा काळ” असे संबोधले.

राष्ट्राध्यक्ष ट्रम्प यांनी असा दावा केला की, २८ फेब्रुवारीला संघर्ष सुरू झाला तेव्हा इराण अधिक मजबूत होता, मात्र आता अमेरिका त्याला कमकुवत करण्यात यशस्वी झाली आहे. त्यांनी म्हटले की, गेल्या ४७ वर्षांत जे पाऊल उचलले गेले पाहिजे होते, ते आता उचलले जात आहे. तसेच त्यांनी आणखी एक मोठा दावा करत सांगितले की, इराणमधील काही लोक स्वतः अमेरिकेला “बॉम्बहल्ले सुरू ठेवण्याची” विनंती करत आहेत, कारण त्यांना आपल्या देशात स्वातंत्र्य हवे आहे. त्यांच्या मते, इराणमधील परिस्थिती अत्यंत वाईट असून विरोधकांवर कठोर कारवाई केली जाते.

ट्रम्प यांनी स्पष्टपणे सांगितले की, इराणविरुद्धच्या युद्धादरम्यान नाटो तसेच अमेरिकेचे जवळचे सहयोगी देश — जपान, ऑस्ट्रेलिया आणि दक्षिण कोरिया — यांनी अमेरिकेला अपेक्षित साथ दिली नाही. व्हाइट हाऊसमधील पत्रकार परिषदेत त्यांनी म्हटले की, या युद्धामुळे नाटोसह संबंधांवर असा परिणाम झाला आहे, जो त्यांच्या मते कधीच पूर्णपणे सुधारला जाणार नाही.

नाटोला त्यांनी “पेपर टायगर” म्हणजेच कमकुवत संघटना असे संबोधले आणि रशियाचे राष्ट्राध्यक्ष व्लादिमीर पुतिन यांनाही त्याची भीती वाटत नाही, असे त्यांनी म्हटले. ट्रंप यांच्या मते, नाटोसह तणाव वाढण्यामागे ग्रीनलंडचा मुद्दा कारणीभूत ठरला. त्यांनी सांगितले की, ग्रीनलंड अमेरिकेत सामील करण्याचा प्रस्ताव त्यांनी मांडला होता, मात्र तो नाकारल्यानंतर संबंध बिघडू लागले. “आम्हाला ग्रीनलंड हवे आहे, पण ते देण्यास तयार नाहीत — इथूनच सगळ्याची सुरुवात झाली,” असे ते म्हणाले.

ट्रम्प यांनी सांगितले की, मागील ३७ दिवसांत अमेरिकन सैन्याने इराणविरुद्ध मोठ्या प्रमाणावर हवाई मोहीम राबवली. व्हाइट हाऊसमध्ये पत्रकारांशी बोलताना त्यांनी सांगितले की, या कालावधीत अमेरिकन सैन्याने १०,००० हून अधिक युद्धउड्डाणे केली आणि १३,००० पेक्षा जास्त ठिकाणांवर हल्ले केले. त्यांनी या मोहिमेचे कौतुक करत म्हटले की, इतक्या मोठ्या प्रमाणावर यापूर्वी कधीही अशी कारवाई झाली नव्हती.

ट्रम्प यांनी पुढे सांगितले की, या मोहिमेदरम्यान अमेरिकेचे एफ-१५ई हे लढाऊ विमान इराणकडून पाडण्यात आले. या संपूर्ण कारवाईत प्रथमच शत्रूपक्षाने अमेरिकन वैमानिक असलेले विमान पाडले. विमानातील वेपन्स सिस्टिम्स ऑफिसर सुरक्षित बाहेर पडण्यात यशस्वी झाला, मात्र त्याला दुखापत झाली. तो कठीण डोंगराळ भागात उतरला आणि प्रशिक्षणानुसार स्वतःचा बचाव करण्यासाठी उंच भागाकडे जात राहिला.

---------------

हिंदुस्थान समाचार / Priyanka Bansode