सहा जणांना अटक नऊ गुन्हे दाखल

नाशिक, 08 एप्रिल (हिं.स.)।

नाशिकमधील एका नामांकित बहुराष्ट्रीय कंपनीत (MNC) कार्यरत महिला कर्मचाऱ्यांचा विनयभंग, लैंगिक व मानसिक छळ, तसेच धार्मिक भावना दुखावल्याचा धक्कादायक प्रकार समोर आला आहे. या गंभीर प्रकरणाची दखल घेत नाशिक शहर पोलिसांनी आतापर्यंत एकूण ९ गुन्हे दाखल केले असून, ६ संशयित आरोपींना बेड्या ठोकल्या आहेत. प्रकरणाचे गांभीर्य ओळखून पोलीस आयुक्तांनी याच्या तपासासाठी 'विशेष तपास पथक' (SIT) गठित केले आहे.

नाशिक मध्ये अशोक खरात आणि एनजीओ च्या नावावरती महिलांचे लैंगिक शोषण करणार आहे रवींद्र एरंडे यांचे प्रकरण ताजे असतानाच आता पुन्हा एकदा एक नवीन प्रकरण समोर आलेला आहे या आंतरराष्ट्रीय कंपनीमध्ये एका विशिष्ट धर्माच्या युवकांकडून हिंदू महिला आणि मुलींवरती शारीरिक मानसिक अत्याचार केल्याचे समोर आले असून याबाबत शहरातील एका पोलीस ठाण्यामध्ये गुन्हा दाखल करण्यात आलेला आहे.

सर्व प्रकरणात उपलब्ध झालेली अधिक माहिती अशी की,

शहरातील एका मोठ्या कंपनीत काही पुरुष कर्मचाऱ्यांकडून महिलांना त्रास दिला जात असल्याच्या तक्रारी प्राप्त झाल्या होत्या. यात केवळ विनयभंगच नाही, तर महिलांचा मानसिक छळ करणे आणि त्यांच्या धार्मिक भावनांना ठेच पोहोचवण्याचेही गंभीर प्रकार घडले आहेत. या घटनांमुळे औद्योगिक क्षेत्रात मोठी खळबळ उडाली आहे.

या गुन्ह्यांची व्याप्ती आणि संवेदनशीलता लक्षात घेऊन पोलीस आयुक्त संदीप कर्णिक यांनी या प्रकरणाचा सखोल तपास करण्याचे आदेश दिले आहेत. त्यानुसार, साहाय्यक पोलीस आयुक्त (गुन्हे) यांच्या नेतृत्वाखाली एक विशेष तपास पथक (SIT) तैनात करण्यात आले असून, हे पथक आता या प्रकरणाच्या मुळाशी जाणार आहे.

आस्थापनांना कडक सूचना

या घटनेच्या पार्श्वभूमीवर पोलिसांनी सर्व खासगी कंपन्या आणि आस्थापनांना कडक इशारा दिला आहे. कार्यस्थळी महिलांच्या सुरक्षिततेसाठी आवश्यक त्या सर्व प्रतिबंधात्मक उपाययोजना आणि खबरदारी घेणे बंधनकारक असल्याचे प्रशासनाने स्पष्ट केले आहे.

तक्रारदाराची ओळख गोपनीय राहणार

कोणत्याही महिलेला विनयभंग किंवा छळाचा त्रास होत असल्यास त्यांनी घाबरून न जाता समोर यावे. तक्रारदार महिला किंवा माहिती देणाऱ्या व्यक्तीची ओळख पूर्णपणे * गोपनीय * ठेवली जाईल, असे आवाहन पोलीस आयुक्त संदीप कर्णिक यांच्या वतीने करण्यात आले आहे.

ज्या महिलांना तक्रार करावयाची असेल त्यांनी

९९२३३२३३११, नियंत्रण कक्षः ११२ या क्रमांकावर ती संपर्क करावा असे आवाहन एसआयटी प्रमुख सहाय्यक आयुक्त संदीप मिटके यांनी केले आहे

---------------

हिंदुस्थान समाचार / GOSAVI CHANDRASHEKHAR SUKDEV